Rossiyada jurnalist Ponomarenkoga nisbatan uchinchi ish ochildi

Mariya Ponomarenkoga nisbatan badanga yengil shikast yetkazish moddasi bo‘yicha uchinchi jinoiy ish ochildi, deya xabar bermoqda uning tarafdorlari.

Foto: Telegram / freeponomarenko

Rossiyada armiya haqidagi «feyk ma’lumotlarni» tarqatishda ayblanib sudlangan jurnalist Mariya Ponomarenkoga nisbatan uchinchi jinoiy ish ochildi. Bu haqda jurnalistga xayrixohlar tomonidan boshqariladigan «Svobodu Marii Ponomarenko!» Telegram-kanalidagi xabarda aytiladi. U 31 avgust, yakshanba kuni e’lon qilingan.

«Rossiya Federatsiyasi Jinoyat kodeksining 321-moddasi 2-qismi (badanga yengil shikast yetkazish) bilan Rubsovsk shahridagi IK-9da Mariya Ponomarenkoga nisbatan uchinchi jinoiy ish ochildi. U hozircha ko‘rsatma bergani yo‘q», — deyiladi postda. Mualliflar bu masala bo‘yicha boshqa tafsilotlarni keltirmaydi.

2022 yil aprel oyida RusNews jurnalisti Mariya Ponomarenko Mariupoldagi drama teatriga rossiyaliklarning zarbasi haqidagi posti tufayli Rossiya Qurolli kuchlari to‘g‘risida «feyk» xabar tarqatganlikda ayblanib qo‘lga olingan edi. 2023 yil fevral oyida u bu ish bo‘yicha olti yillik qamoq jazosiga hukm qilindi.