Ukrainaga qo‘shin yuborish rejasi: Pistorius YeK rahbarini tanqid qildi

Germaniya mudofaa vaziri Boris Pistorius Yevropa Komissiyasi (YeK) raisi Ursula fon der Lyayyenni urushdan keyingi davrda Kiyev uchun uzoq muddatli xavfsizlik kafolatlari doirasida Ukrainada ko‘p millatli harbiy kontingentni joylashtirish rejalari haqida ochiq gapirgani uchun tanqid qildi. Pistoriusning so‘zlariga ko‘ra, tinchlik muzokaralari boshlanishidan oldin bunday variantlarni muhokama qilish «mutlaqo noto‘g‘ri», deb yozadi Politico.

Pistorius Trosdorfdagi (Shimoliy Reyn-Vestfaliya) mudofaa sanoati zavodida: «Yevropa Ittifoqi qo‘shinlarni joylashtirish uchun hech qanday javobgarlikka yoki vakolatga ega emas — hech kim yoki hech narsa uchun», dedi. «Bunday mulohazalar bo‘yicha har qanday tasdiqlash yoki izoh berishda men juda ehtiyotkor bo‘lardim», deya qo‘shimcha qildi u.

Pistoriusning so‘zlariga ko‘ra, hukumatlar «qanday sharoitda va qanday shartlar bilan» amalga oshiriladigan ehtimoliy narsalarni o‘rganmoqda. «Hozirgi bosqichda buni ochiq muhokama qilish mutlaqo noto‘g‘ri, deb hisoblayman», deb ta’kidladi Germaniya mudofaa vazirligi rahbari.