Germaniya O‘zbekistonga Afg‘onistondan evakuatsiya bo‘yicha yordam uchun minnatdorlik bildirdi

Germaniya hukumati O‘zbekistonga Yevropa mamlakatlari fuqarolarini Afg‘onistondan shoshilinch evakuatsiya qilish chog‘ida hamkorlik qilgani uchun minnatdorlik bildirdi.

Germaniyaning Toshkentdagi elchixonasi tomonidan e’lon qilingan rasmiy xabarda: "Ushbu jarayonni O‘zbekiston bilan hamkorliksiz uddalab bo‘lmas edi", – deya qayd etilgan.

"Germaniya Toshkent aeroporti orqali o‘z fuqarolarini xavfsiz hududga olib chiqib, Germaniyaga yetkazdi, – deb yozilgan elchixona bayonotida. – Ushbu imkoniyatni tez va samarali ta’minlagan O‘zbekiston hukumati hamda barcha tegishli idoralarga minnatdorlik bildiramiz".