Kirkni o‘ldirishda gumonlanuvchi tergov bilan hamkorlik qilmayapti

Mashhur konservativ faol va bloger Charli Kirkni o‘ldirishda gumonlanayotgan 22 yoshli Tayler Robinson AQSh rasmiylari bilan hamkorlik qilishdan bosh tortmoqda. Bu haqda 14 sentabr, yakshanba kuni Yuta gubernatori Spenser Koks ABC News telekanalida ma’lum qildi. «U rasmiylarga aybini tan olmadi. U hamkorlik qilmayapti, lekin uning atrofidagi barcha odamlar hamkorlik qilmoqda. Va menimcha, bu juda muhim», — deydi Koks.

Tayler Robinson haqidagi ma’lumotni rasmiylar bilan bo‘lishayotganlar orasida Koks uning xonadoshini keltirdi. Yuta shtati gubernatori avvalroq The Wall Street Journal nashriga gumonlanuvchiga so‘l g‘oyalar kuchli ta’sir ko‘rsatganini aytdi. Koks, shuningdek, Charli Kirk otib tashlanganidan so‘ng gumonlanuvchi Discord platformasi foydalanuvchilariga «hazil bilan» o‘q otgan shaxs o‘zi ekanligini aytganini tasdiqladi.

Robinsonga 16 sentabrda rasman ayblov e’lon qilinishi kutilmoqda. Shundan so‘ng jamoatchilik «ko‘proq ma’lumotga ega bo‘ladi», dedi Koks.