Surishtiruv: Germaniyada qidiruvda bo‘lgan Marsalek Moskvada yashayapti

Nemis adliyasidan yashiringan Wirecard moliyaviy kompaniyasining sobiq bosh direktori Yan Marsalek Moskvada yashayapti, Rossiya FSB bilan hamkorlik qilyapti va Rossiya Federatsiyasi tomonidan bosib olingan Ukraina hududlariga muntazam tashrif buyuryapti. Bu haqda The Insider va Der Spiegel nashrlarining 16 sentabr, seshanba kuni chop etilgan qo‘shma surishtiruvida aytiladi.

Jurnalistlarning ta’kidlashicha, Marsalek dunyo miqyosida qidirilayotgan jinoyatchilardan biri bo‘lib, «deyarli yashirinmagan holda» Moskva markazida sayr qilib yuradi. Chop etilgan fotosuratlardan birida Wirecard boshqaruv kengashining sobiq a’zosi go‘yoki Rossiya FSBning 41 yoshli xodimi Tatyana Spiridonova bilan birga yurgan. Marsalek u bilan kamida 2021 yildan beri munosabatda bo‘lgan, deyiladi qo‘shimcha ma’lumotlarda.

«Spiridonova Marsalekning ko‘plab operatsiyalaridan xabardor bo‘lgan va hatto ularda qatnashgan. Masalan, 2022 yilning iyun oyida Marsalek o‘zi Venada yaratgan josuslik tarmog‘i yordamida bir guruh avstriyalik siyosatchilar va xavfsizlik amaldorlarini kuzatgan», deb yozadi jurnalistlar.