Xorijiy va nodavlat OTM uchun 1320 ta davlat granti tasdiqlandi

2025 yil 29 sentabrdan 5 oktyabrga qadar (shu kuni ham) muayyan xorijiy va nodavlat oliy ta’lim tashkilotlariga to‘lov-kontrakt asosida talabalikka tavsiya etilgan yoshlar uchun mazkur bayon bilan tasdiqlangan davlat buyurtmasi parametrlariga (talabalikka tavsiya etilgan oliy ta’lim tashkiloti va ta’lim yo‘nalishi bo‘yicha) abituriyent sifatida ro‘yxatdan o‘tish imkoniyati yaratiladi.

Ro‘yxatdan o‘tgan abituriyentlar uchun 2025 yil 12 oktyabrga qadar test sinovlari o‘tkaziladi.

Ro‘yxatdan o‘tgan abituriyentlardan prezidentning 2019 yil 14 maydagi PQ–4319-son qaroriga muvofiq belgilangan miqdordagi to‘lov undiriladi.

O‘tkazilgan test sinovlari natijasiga ko‘ra abituriyentlarning to‘plagan ballari ketma-ketligiga qat’iy rioya qilgan holda shakllantirilib, belgilangan tartibda rasmiylashtirish uchun 2025 yil 17 oktyabrga qadar tegishli oliy ta’lim tashkilotlariga yetkaziladi.

Shuningdek, ushbu tanlovda 2025-2026 o‘quv yiliga davlat oliy ta’lim tashkilotlarining bakalavriat ta’lim yo‘nalishlariga kirish uchun ro‘yxatdan o‘tib, kirish imtihonlarida ishtirok etgan, biroq talabalikka tavsiya etilmagan abituriyentlarga ham to‘plagan ballari bilan fanlar majmuasi va ta’lim tili mos bo‘lgan bakalavriat ta’lim yo‘nalishlariga tanlovda ishtirok etish imkoniyati berildi.