Chexiya parlament saylovlari oldidan aralashuvdan xavotirda

Yuzlab anonim TikTok akkauntlari 3-4 oktyabr kunlari bo‘lib o‘tadigan Chexiya parlamenti quyi palatasiga saylovlar arafasida rossiyaparast pozitsiyani faol ravishda tarqatmoqda va radikal partiyalarni qo‘llab-quvvatlamoqda. Bu haqda 28 sentabr, yakshanba kuni Chexiyaning Online Risk Labs tadqiqot guruhi ma’lum qildi.

U 286 ta shunday akkauntni aniqladi. Mutaxassislarning fikriga ko‘ra, ko‘rishlar haftasiga 5 milliondan 9 milliongacha — yirik partiyalar rahbarlarining umumiy auditoriyasidan ko‘proq. «Ushbu akkauntlar hech qanday siyosiy tashkilotga aloqador emas, aksincha, bir qancha radikal va ekstremistik partiyalarni qo‘llab-quvvatlashini namoyish etadi», — deya xabar berdi Online Risk Labs.

Chexiya aholisining deyarli chorak qismi TikTokʼdan foydalanadi, deya xabar beradi Reuters. Chexiya telekommunikatsiya regulyatori CTU akkauntlardagi kontent bo‘yicha bir nechta shikoyatlar olganini ma’lum qildi. «Biz bu ayblovlarni asosli deb hisobladik va ularni yirik platformalar bo‘yicha nazorat organi sifatida Yevropa komissiyasiga yubordik», deya xabar berdi CTU.

TikTok va Chexiya Ichki ishlar vazirligi vakillari hozircha ma’lumotga izoh bermadi.

Deník N portali xabar qilganidek, akkauntlar Yevropa Ittifoqi va NATOga qarshi kontent tarqatadi, Ukrainadagi urushni oqlaydi va SPD ("Ozodlik va to‘g‘ri demokratiya") hamda Stačilo! ("Yetarli!") kabi o‘ng populistik partiyalarni targ‘ib qiladi.