G‘azodagi yirik dafn marosimi va Kiyev uzra ballistik raketalar – kun dayjyesti

Shuningdek, Tramp bilan gaplashgan Qatar amiri Shayx Tamim ham Vashington va Tehron o‘rtasida uzoq muddatli kelishuv istiqbollarini yaxshilashni muhokama qilgan.

Qizil dengizda Saudiya Arabistoniga dengiz qamalini joriy qilgan husiylar esa neft eksporti yo‘nalishlarini nazorat qilishga intilmoqda. Xususan, kecha Yaman yaqinida Hindiston bayrog‘i ostida suzayotgan kemaga snaryad kelib urilishi oqibatida u ag‘darilib cho‘kib ketdi. Bortdagi barcha 14 nafar dengizchi qutqarib qolingan. Yaman hukumati ushbu hujumda husiylarni aybladi.

Kiyevga ballistik raketalar hujumi

Rossiya Ukrainaga ballistik raketalar va dronlar bilan hujum qildi. Oqibatda 15 kishi halok bo‘ldi va kamida 22 kishi jarohatlandi. Kiyev harbiy ma’muriyati rahbari Timur Tkachenkoning aytishicha, hujumlar chorshanba kuni yarim tundan keyin boshlangan.

Uning aytishicha, poytaxtning Borispol tumanida to‘qqiz, Bucha tumanida to‘rt va Fastov tumanida bir kishi halok bo‘lgan. Turar joy binolari va omborlarga zarar yetgan.

Kecha Xersonda bir kishini ruslarning droni quvib ketayotgani aks etgan video ham tarqalgandi. Ukraina buni tinch aholini nishonga olgan qasddan «ov» deb atadi.

Rossiya mudofaa vazirligi esa Kiyev va uning atrofidagi logistika-ta’minot markazlariga zarba berganini tasdiqladi. «Ushbu markazlar turli xil qurol va harbiy texnikalarni saqlash, yetkazib berish, shuningdek, dronlarni ishlab chiqarish va tarqatish bilan shug‘ullangan», deyiladi bayonotda.

Shuningdek, Rossiya harbiylari Odessa porti yaqinida «qurol-yarog‘ va harbiy texnika olib ketayotgan» uchta yuk kemasiga ham zarba berdi.

So‘nggi haftalarda ikki tomon ham o‘zaro hujumlarni kuchaytirdi. Kecha Ukraina Moskva viloyatida «Wildberries» omborlariga zarba berib, 5 kishining o‘limiga sabab bo‘lgandi. Undan oldin Ukrain droni Gelenjikdagi plyajda odamlar ustiga qulab, 7 kishini o‘ldirgandi.

Ammo har ikki tomon ham tinch aholi ataylab nishonga olinganini rad etib keladi. Ukraina Rossiyaning ballistik hujumlaridan himoyalanish uchun ittifoqchilardan Patriot raketalarini ko‘proq berishni so‘ramoqda.

Gvatemalada vulqon otildi

Gvatemaladagi Fuego vulqonining otilishi uning yonbag‘irlarida joylashgan kamida ikkita qishloq aholisini evakuatsiya qilishga sabab bo‘ldi.

G‘arbiy yarimsharning eng faol vulqonlaridan biri bo‘lgan Fuego dushanba kuni lava va kul purkashni boshlagandi.

Uning faoliyatini kuzatuvchi agentlikning ma’lum qilishicha, seshanba kuni tongda Fuegoning janubi-sharqiy yonbag‘ridan piroklastik oqim oqib tushishda davom etgan.

Piroklastik oqim - bu erigan lava emas, balki undan ko‘ra ancha tezroq, kutilmagan va vayronkor bo‘lgan qaynoq gaz hamda vulqon kulining ko‘chkisidir.

Rasmiylar butun mamlakat bo‘ylab sariq rangli ogohlantirish e’lon qildi. Vulqon otilishi yanada ko‘proq gazlar va kul bulutlarini yuzaga keltiradi. Shu bois, odamlar deraza va eshiklarini yopiq holda saqlashga chaqirildi. Vulqonga yaqin joylashgan maktablarda darslar bekor qilindi.

Fuego sayyohlar orasida mashhur bo‘lgan shahar atrofida joylashgan. Shu bois tashrif buyuruvchilar ham, mahalliy aholi ham xavfli hududlarga yaqinlashmaslik bo‘yicha ogohlantirildi.

2018-yilda Fuego vulqoni otilishi oqibatida 200 dan ortiq odam halok bo‘lgandi. Ularning ko‘pchiligi katta tezlikda pastga tushgan piroklastik oqim ostida qolib ketgandi.

Isroil G‘azodan chiqmoqchi emas

Isroil bosh vaziri Binyamin Netanyahu Hamas «to‘liq» qurolsizlanmaguncha uning armiyasi G‘azoda o‘zi egallab turgan hududlardan chekinmasligini aytdi.

«Hamas to‘liq qurolsizlantirilmaguncha biz hozirgi pozitsiyalarimizdan chekinmaymiz. Men xavfsizlik manfaatlarimizga sodiq qolaman», deb ta’kidlagan Netanyahu.

Uning murojaati AQSh prezidenti Donald Tramp va Tinchlik kengashi Hamasning qurolsizlanishi borasidagi xabarlarni e’lon qilgach paydo bo‘ldi.

«Ular bizga loyiha yuborishdi, biz uni ma’qullamadik va ularga o‘z izohlarimizni yubordik», dedi Netanyahu.

Tel-Aviv har qanday chekinishdan oldin qurolsizlantirish to‘liq yakunlanishi kerakligini ta’kidlamoqda. Tinchlik kengashi e’lon qilgan va Hamas qabul qilgan yo‘l xaritasi esa bu ikki qadamni bosqichma-bosqich, parallel ravishda amalga oshirishni talab qiladi.

Biroq Nikolay Mladenov va Netanyahu o‘rtasidagi uchrashuvdan so‘ng, Tinchlik kengashi ham og‘ir va yengil qurollar, shuningdek, tunnellar yo‘q qilinmagunicha Isroilning to‘liq chekinishi ro‘y bermasligi haqida gapira boshladi.

Hamas esa sulh jarayonining ikkinchi bosqichi bo‘yicha kelishilgan masalalarga sodiqligini tasdiqladi.