Vengriya Ukrainaning 12 ta yangiliklar saytini blokladi

Vengriya hukumati Ukrainaning 12 ta yetakchi yangiliklar portaliga mamlakat ichida kirishni to‘sib qo‘ydi. Bu chora-tadbirlar Budapeshtning «Ukraina senzurasiga javobidir», dedi Vengriya bosh vaziri Viktor Orban idorasi rahbari Gergey Guyyash 29 sentabr, dushanba kuni Facebookʼda.

Vengriyalik siyosatchi Kiyevni Vengriyaning rossiyaparast internet-resurslarini, jumladan, mashhur origo.hu yangiliklar saytini Yevropaning Rossiyaga qarshi sanksiyalari, Ukrainani harbiy qo‘llab-quvvatlash haqidagi tanqidiy xabarlari, shuningdek, Yevropa Ittifoqi va NATOning go‘yoki «parchalanishi va samarasizligi» tufayli bloklaganlikda aybladi. Bundan tashqari, Guyyashning so‘zlariga ko‘ra, Vengriya veb-saytlari Soros jamg‘armasini tanqid qilgani uchun Ukrainada bloklangan.

«Menimcha, ko‘pchilik «Ukrainskaya pravda»ni o‘qimaydi, hatto o‘qishni ham xohlamaydi. Biroq, suveren davlat mutlaqo asossiz hujumga mutanosib javob berishi kerak», — deb yozdi Guyyash «o‘zaro munosabatlar tamoyili»ni keltirib

Bloklangan veb-saytlar orasida "TSN - Novini Ukraini", Hromadske, "Ukrainskaya pravda", "Yevropeyskaya pravda", Oboz.ua, Nv.ua, Anons-zak.com.ua, Ungvar.uz.ua, Zakarpattya.net.ua, Lb.ua, Insiderinfo.com.ua va Uaonline.com.ua bor.

Sentyabr oyi o‘rtalarida Ukraina hukumati bir qancha xorijiy veb-saytlarni, jumladan, Vengriyaning Origo va Demokrata veb-saytlarini Rossiya tashviqoti haqidagi pozitsiyani muntazam tarqatishda ayblab, taqiqlagan edi.