Yuzdagi pardozni yuvmasdan uxlash terini qanday shikastlaydi?

Teshiklar (poralar) tiqilib qoladi

Yuz terisidagi teshiklar yoki poralar (porekalar) terining tabiiy nafas olish va yog‘ balansini saqlashida muhim rol o‘ynaydi. Ammo kundalik hayotda ular turli omillar natijasida tiqilib qolishi mumkin. Eng keng tarqalgan sabablar quyidagilar: pardoz vositalari, yuzga surtilgan krem va losyon qoldiqlari, shuningdek, kun davomida havo orqali tushgan chang va terining o‘z yog‘i.

Teshiklar tiqilganida teri nafas ola olmaydi, bu esa husnbuzar, qora nuqtalar va boshqa muammolarga olib keladi. Shuningdek, teri rangi xiralashadi, yuz silliqligi kamayadi va teri sog‘lom ko‘rinmaydi. Mazkur muammoning oldini olish uchun yuzni muntazam tozalash, pardoz vositalarini to‘g‘ri tanlash va ularni kechqurun yaxshilab yuvish kerak.

Teri tez qarishni boshlaydi

Tunda teri tabiiy yangilanish va tiklanish jarayonidan o‘tadi. Shu paytda hujayralar zarar ko‘rgan qismlarni tiklaydi, ozuqa moddalarni so‘radi va toksinlardan xalos bo‘ladi. Ammo yuz kechqurun tozalanmagan bo‘lsa, pardoz vositalari, chang va teridagi yog‘ qoldiqlari poralarni siqib qo‘yib, hujayralarga kislorod va ozuqa moddalari yetib borishini to‘sadi. Natijada terining tiklanishi sekinlashadi, ajinlar erta paydo bo‘ladi va teri elastikligini yo‘qotadi. Yuzda “charchoq ifodasi”shakllanadi, teri xiralashadi. Shu sababli, kundalik yuz tozalash odati juda muhim hisoblanadi.

Yallig‘lanish va allergiya xavfi

Kosmetik vositalar tarkibida turli kimyoviy moddalar mavjud bo‘ladi. Ularni kechasi yuzda qoldirsangiz, teri ushbu moddalarni uzoq vaqt davomida o‘ziga singdiradi. Natijada qizarish, shish, yallig‘lanish, hatto allergik reaksiyalar yuzaga kelishi ham mumkin. Bunday holatlar nafaqat terining sog‘lig‘iga salbiy ta’sir qiladi, balki yuzning tabiiy yangilanish jarayonini sekinlashtiradi. Shu sababli, kechqurun yuzni yaxshilab tozalash, pardoz qoldiqlarini va changni olib tashlash juda muhim.

Ko‘z atrofidagi nozik teriga zarar

Ko‘z atrofidagi teri juda nozik va sezgir bo‘lib, unga alohida e’tibor kerak. Tush va tenni yuvmasdan uxlash yuzning ushbu qismida turli muammolar paydo bo‘lishiga olib keladi. Avvalo, kipriklar ifloslik va pardoz qoldiqlari ta’sirida sinishi yoki to‘kilishi mumkin. Shu bilan birga, ko‘z shilliq qavati tirnalib, qizarish hamda noqulaylik paydo bo‘ladi. Ertalab uyg‘onganingizda esa shishlar va qora halqalar kattalashadi, ko‘zlar charchagan ko‘rinadi. Bu nafaqat estetik jihatdan noqulay, balki ko‘z atrofidagi terining sog‘lig‘iga ham salbiy ta’sir qiladi. Shu sababli, kechqurun ko‘z atrofini maxsus yuvish vositalari bilan tozalash, makiyaj qoldiqlarini olib tashlash va terini namlantirish juda muhimdir.