2025 yilning eng noodatiy skincare trendlari: teriga ongli parvarish vaqti keldi

Skincare nima o‘zi?

So‘nggi yillarda internet va kosmetika olamida “skincare” atamasi tez-tez qulog‘imizga chalinib qolmoqda. Bu so‘z inglizchadan “skin” — teri va “care” — parvarish degan ma’noni anglatadi. Ya’ni skincare — bu teriga to‘g‘ri g‘amxo‘rlik qilish, uni tozalash, oziqlantirish va tashqi ta’sirlardan muhofaza etish tizimidir.

Ilgari bu faqat krem yoki niqob qo‘llash bilan cheklangan bo‘lsa, hozirda skincare — to‘liq turmush tarziga aylandi: to‘g‘ri ovqatlanish, uyqu, stress bilan kurashish va terining tabiiy balansiga ehtiyot bilan munosabatda bo‘lishni ham o‘z ichiga oladi.

Skin fasting — teriga dam berish modaga aylandi

2025 yilda “skin fasting”, ya’ni terini kosmetikadan “ro‘za” tuttirish tendensiyasi ommalashmoqda. Bu usulda 1-2 kun davomida hech qanday krem va sivorotkalar qo‘llanmaydi. Mutaxassislar ta’kidlashicha, bu teriga nafas olish va tabiiy muhofaza funksiyasini tiklash imkonini beradi.

Dermatolog Aziza Karimova: “Ba’zan biz terimizga ortiqcha mahsulotlar qo‘llab, uni charchatamiz. Teri ham organizmning bir qismi — unga ham dam kerak. Vaqti-vaqti bilan qilingan bu tanaffus teriga foydali” deydi.

Shuningdek, bu yilning yana bir trendi “aqlli” kremlar, ya’ni aqlli skincare mahsulotlardir. Ular terining holatini “o‘rganib”, uning ehtiyojiga mos ravishda ishlaydi: agar namlik yetishmasa — gidratatsiyani oshiradi, qizarish bo‘lsa — tinchlantiradi. Kosmetikada sensor texnologiyalar va biodetektorlar qo‘llanishi skincare’ni yangi bosqichga olib chiqmoqda.

Bugungi skincare dunyosida “bakteriya” so‘zi endi qo‘rqinchli emas. Aksincha, teridagi foydali bakteriyalar — uning tabiiy muhofazasi hisoblanadi. Probiotik va prebiotikli kremlar, toniklar va sivorotkalar terini sog‘lomlashtirishda asosiy vositaga aylanmoqda.

Keyingi trend: SPF – faqat yoz uchun emas. “SPF kremni faqat yozda qo‘llash kerak” degan qarash 2025 yilda mutlaq yo‘qqa chiqdi. Chunki ultrabinafsha nurlar yil bo‘yi faol bo‘lib, hatto uy ichidagi ekran yorug‘ligi ham teriga ta’sir qiladi. Shuning uchun SPF – endi har kunlik vositaga aylandi.

2025 yilning skincare trendlari insonga va uning tabiiy holatiga yondashuvni o‘zgartirmoqda. Go‘zallik endi filtr ortida emas — ongli parvarish, sog‘lom teri va hayot balansida.

Skincare bu — oddiy parvarish emas. Bu o‘zingni sevishning va sog‘lom yashashning birinchi qadami hisoblanadi.