Ikkinchi jahon urushida halok bo‘lgan o‘zbek askarining xoki Belarusdan olib kelindi

Abdullajon Dadaboyev 1918 yilda Farg‘ona viloyati O‘zbekiston tumanida tug‘ilgan. Ikkinchi jahon urushi davrida Belarusni dushmanlardan himoya qilish vaqtida halok bo‘lgan. Uning xoki O‘zbekiston Mudofaa vazirligi va mamlakat elchixonasi vakillariga topshirildi.

Xotira tadbirida Buda-Koshelevo tumani ijroiya qo‘mitasi rahbariyati, keng jamoatchilik, faxriylar va yoshlar qatnashdi.

Tuman Ijroiya qo‘mitasi raisi Valentin Undrul o‘z nutqida oradan shuncha yillar o‘tgan bo‘lsa-da, o‘sha dahshatli urush hamon yangi-yangi faktlar, voqealar, tarixlar bilan o‘zini eslatib turganini va aniqlanayotgan har bir dalil inson hayotidagi katta fojia ekanini ta’kidladi. Uning aytishicha, joriy yilda olib borilgan qidiruv ishlari davomida Farg‘ona viloyatida 1918 yilda tug‘ilgan jangchi Abdullajon Dadaboyevning tana qoldiqlari hamda unga tegishli jihozlar va o‘q-dorilar Rogin qishlog‘i hududida olib borilgan qidiruv ishlari davomida topilgan.

Tuman rahbari qidiruv ishlarini olib borgan Belarus Mudofaa vazirligining 52-ixtisoslashtirilgan qidiruv bataloni va Gomel kadetlar bilim yurtining "Qizil pogonlar" qidiruv klubiga minnatdorlik bildirdi.

O‘zbek xalqining farzandi Abdullajon Dadaboyevning xoki 27 sentabr kuni Minsk shahridan O‘zbekistonga olib kelindi.