«Shimoliy oqimlar» portlatilishi: Polsha Ukraina fuqarosining hibsdagi muddatini uzaytirdi

Varshava sudi 6 oktyabr, dushanba kuni «Shimoliy oqim» va «Shimoliy oqim 2» gaz quvurlari portlashlariga aloqadorlikda gumon qilingan ukrainalik g‘avvosni hibsda saqlash muddatini 40 kunga, 2025 yil 9 noyabrgacha uzaytirdi.

Erkak Germaniya hukumati tomonidan chiqarilgan hibsga olish uchun Yevropa orderi asosida qidiruvda bo‘lgan va 30 sentabr kuni Varshava chekkasida Polsha politsiyasi tomonidan qo‘lga olingan. Gumonlanuvchining hibsga olish muddati uzaytirilishi uning Germaniyaga ekstraditsiya qilinishi bo‘yicha qaror qabul qilish jarayoni bilan bog‘liq, deya xabar beradi Reuters. Ukrainalikning advokati Timoteush Parokkining so‘zlariga ko‘ra, prokuratura dastlab gumonlanuvchini hibsda saqlash muddatini 100 kunga uzaytirishni so‘ragan.

Polsha ommaviy axborot vositalari hibsga olingan shaxsni dayving bo‘yicha instruktor deb atamoqda, uning to‘liq ismi oshkor qilinmayapti. Bu Vladimir Juravlev bo‘lishi mumkin, 2024 yil iyun oyida Berlin Varshavaga uni hibsga olish uchun order yuborgan. Polsha prokuraturasi ichki xavfsizlik agentligi ishni ko‘rib chiqishi zarurligini bahona qilib, Berlin va Varshava o‘rtasidagi mojaroga olib kelgan holatda gumondorni hibsga olishdan bosh tortgan.

Polshaning PAP axborot agentligi xabar berishicha, Germaniya Polsha rasmiylari tomonidan qo‘lga olingan shaxsni konstitutsiyaga zid bo‘lgan sabotaj, mulkni va «Shimoliy oqim 2» quvurini yo‘q qilishda gumonlamoqda. Germaniya qonunchiligiga ko‘ra, unga 15 yilgacha qamoq jazosi berilishi mumkin. «49 yoshli ukrainalik hujumga («Shimoliy oqim 2» portlashi) hech qanday aloqasi yo‘qligini va hujum vaqtida u Ukrainada bo‘lganini da’vo qilmoqda», — deyiladi PAP nashrida.