So‘rov: amerikaliklarning aksariyati RFga qarshi yangi sanksiyalarni qo‘llab-quvvatladi

Amerikaliklarning katta qismi (77 foiz) Ukrainadagi urushni tugatish uchun Rossiyaga nisbatan AQSh sanksiyalarini kuchaytirishni qo‘llab-quvvatlamoqda. Bu - Harvard Amerika siyosiy tadqiqotlar markazi (Harvard Center for American Political Studies, CAPS) va The Harris Poll / HarrisX tomonidan o‘tkazilgan so‘rov natijalari. 2025 yilning 1 va 2 oktyabr kunlari AQShda ro‘yxatga olingan 2413 nafar saylovchi o‘rtasida onlayn so‘rov o‘tkazildi.

Demokratlar (73 foiz) va respublikachilarning ko‘pchiligi (67 foiz) Ukrainaga sanksiyalar va qurol-yarog‘ yetkazib berishni kuchaytirishni qo‘llab-quvvatlagan. Bundan tashqari, respondentlarning aksariyati (69 foiz) agar bu urushni tugatishga yordam bersa, AQShning Ukraina uchun potensial xavfsizlik kafolatlarini qo‘llab-quvvatlagan.

Respondentlarning 66 foizi AQSh prezidenti Donald Trampning urushni tugatish borasidagi sa’y-harakatlarini qo‘llab-quvvatlashini bildirgan bo‘lsa, atigi 40 foizi Rossiya prezidenti Vladimir Putin bilan Alyaskadagi uchrashuv bu borada foydali bo‘lganiga ishongan. Respondentlarning yarmidan sal ko‘pi (52 foiz) Trampning Ukrainadagi urushni tugatish bo‘yicha olib borayotgan ishlaridan qoniqish hosil qilgan.

Saylovchilarning uchdan ikki qismi (67 foiz) Putin «G‘arb bilan o‘yin o‘ynayapti» va urushni to‘xtatishni chin dildan istamaydi, deb hisoblaydi. Iyul oyida respondentlarning 73 foizi shunday degan. Ukraina prezidenti Volodimir Zelenskiy yuzasidan xuddi shunday savol berilganda, xuddi shu 67 foiz ishtirokchilar uning urushni tugatish niyatida samimiy ekanligiga ishonishini aytgan.

58 foizi Tramp Putinga nisbatan qattiqqo‘l emasligini aytdi. Saylovchilarning 29 foizi Amerika prezidenti Zelenskiyga nisbatan juda qattiqqo‘l ekanini, 33 foizi u yetarlicha qattiqqo‘l emasligini, 38 foizi Trampning Zelenskiyga nisbatan pozitsiyasini to‘g‘ri deb hisoblagan.

Saylovchilardan, shuningdek, Rossiya yoki Ukraina bilan munosabatlarni muhimroq deb bilishi haqida so‘ralgan. Biroq, savol aniqlashtirib berilgan: ulardan «AQShga trillionlab dollarlik foydali qazilmalarning yarmini eksport qilgan va o‘zining harbiy zukkoligi tufayli Rossiyaning Yevropadagi agressiyasini to‘xtatayotgan Ukraina bilan munosabatlar» hamda «yadroviy davlat va Xitoyga qarshi turishi mumkin bo‘lgan Rossiya bilan munosabatlar» o‘rtasida tanlov qilish so‘ralgan.

69 foizi Ukraina bilan munosabatlarni ma’qullagan bo‘lsa, 31 foizi Rossiya bilan munosabatlarni ma’qullagan.