Reyting: eksport hajmi bo‘yicha 30 ta eng yirik davlat

Xitoy AQSh bojlarining asosiy obekti bo‘lib qolsa-da, mamlakat 2025 yilda Afrika, Janubi-Sharqiy Osiyo va Yevropa bilan savdo aloqalarini kengaytirdi. Xitoy o‘zining jahon eksporti yetakchisi maqomini mustahkamlagach, AQSh iqtisodiy jihatdan o‘zini o‘zi ta’minlash darajasini oshirishga tobora ko‘proq e’tibor qaratmoqda.

Foto: AP

Jahon savdo tashkiloti ma’lumotlariga ko‘ra, Xitoy 2024 yilda o‘z eksportini 6 foizga oshirib, 3,6 trillion dollarga yetkazdi va AQSh bilan farqni yanada kengaytirdi. Bugungi kunda global eksport konteynerlarining 36 foizida Xitoy tovarlari mavjud. Xitoy, shuningdek, 2025 yilda Lotin Amerikasi, Afrika va Osiyo bozorlariga rekord darajadagi eksportga tayyorlanmoqda.

Qo‘shma Shtatlar o‘tgan yili 2,1 trillion dollarlik eksport bilan dunyodagi ikkinchi yirik eksportchi bo‘lib qolmoqda. 2025 yilning yanvaridan iyuligacha Amerika tovarlariga talabning taxminan 30 foizi Kanada va Meksika hissasiga to‘g‘ri kelgan.

Germaniya 1,7 trillion dollarlik eksport bilan uchinchi o‘rinni egalladi, bu o‘tgan yilga nisbatan 1 foizga kamaygan bo‘lsa, undan keyingi o‘rinda 921 milliard dollar bilan Niderlandiya bormoqda.

Vetnam, Hongkong va Fransiya eksportning eng tez o‘sishini qayd etdi — mos ravishda +14 foiz, +12 foiz va +11 foiz. Xususan, Vetnamning ekspansiyasi global ta’minot zanjirlarini qayta qurish sharoitida neft, qahva va guruchning faol eksporti bilan bog‘liq.

Rossiya Jahon savdo tashkiloti reytingida 19-o‘rinda. 2025 yilning birinchi yarmida mamlakat mahsulot eksportini o‘tgan yilga nisbatan 2 foizga oshirdi.

Tayyorlagan: Отабек Матназаров

#eksport #Reyting