Toshkentda Germaniya tibbiyot akademiyasi ochildi

Loyiha Migratsiya agentligi, Sog‘liqni saqlash vazirligi, Oliy ta’lim, fan va innovatsiyalar vazirligi, Germaniyaning Aaxen universitet klinikasi hamda Shveytsariyaning Globogate Concept AG kompaniyasi hamkorligida amalga oshirildi.

Ochilish marosimida Migratsiya agentligi direktori Behzod Musayev, oliy ta’lim, fan va innovatsiyalar vaziri Qo‘ng‘irotboy Sharipov, sog‘liqni saqlash vaziri Asilbek Xudoyorov, Toshkentdagi Germaniya elchixonasi — missiya rahbarining o‘rinbosari Klemens Shvanhold, Capmont GmbH kompaniyasi bosh direktori Armin Veibel, Aaxen universiteti klinikasi direktori Mario Hoben va boshqa xorijiy mehmonlar ishtirok etishdi.

Ochilish marosimida loyiha haqida batafsil ma’lumot hamda kutilayotgan natijalar taqdim etilib, akademiya bilan tanishuv tashkil qilindi.

Akademiya Germaniya va O‘zbekiston o‘rtasidagi hamkorlikning yangi bosqichi bo‘lib, o‘rta bo‘g‘in tibbiyot mutaxassislarini Germaniya standartlari asosida tayyorlash, ularning kasbiy rivojlanishini qo‘llab-quvvatlash hamda mehnat migratsiyasi uchun yangi imkoniyatlar yaratishni maqsad qilgan.

Germaniya tibbiyot akademiyasi bitiruvchilari ikki davlat tomonidan tan olinadigan diplomga ega bo‘lib, Germaniyada yuqori va barqaror maosh asosida hamshira sifatida ish boshlash imkoniyatiga ega bo‘ladi.