Myunxenliklar shaharda Olimpiada o‘tkazilishini qo‘llab-quvvatladi

Myunxen aholisining ko‘pchiligi referendumda shaharda 1972 yildan keyin ikkinchi marta Olimpiya va Paralimpiya o‘yinlarini o‘tkazish imkoniyatini qo‘llab-quvvatladi. Bu haqda yakshanba kuni, 26 oktyabrda bo‘lib o‘tgan ovoz berish natijalari guvohlik beradi. Dpa agentligining xabar berishicha, myunxenliklarning ko‘pchiligi 2036, 2040 yoki 2044 yillarda Olimpiada o‘tkazish tarafdori ekani qayd etilgan.

Barcha 364 uchastkada ovozlar sanab chiqilgandan so‘ng aniqlanishicha, “ha” deb ovoz berganlar qarshilaridan deyarli ikki barobar ko‘p — 305 mingga qarshi 154 ming.

Shu bilan birga, dpa ta’kidlashicha, Germaniya Olimpiya sport konfederatsiyasi (DOSB) faqat 2026 yildagina o‘yinlarni o‘tkazish uchun ariza berish-bermaslik masalasida qaror qabul qiladi. Bundan tashqari, musobaqalarni tashkil etish uchun Myunxendan tashqari Berlin, Rayna-Rur regioni yoki Hamburg ham taklif etilishi mumkin. Masalan, Hamburg hokimiyati o‘z referendumini 2026 yil 31 may kuniga belgilagan.

Ovoz berish natijalari kuchga ega bo‘lishi uchun unda ovoz berish huquqiga ega bo‘lganlar sonining kamida 10 foizi — deyarli 110 ming kishi — ishtirok etishi kerak. Referendumda Myunxenda asosiy yashash joyiga ega bo‘lib, kamida ikki oydan buyon shu yerda istiqomat qilayotgan va 2025 yil 26 oktyabrga kelib 18 yoshga to‘lgan barcha YeI fuqarolari ishtirok etishi mumkin edi. Shahar hokimiyati ma’lumotlariga ko‘ra, bunday fuqarolar jami taxminan 1,1 million nafarni tashkil etgan.

Yakunda referendumda aholining 42 foizi ishtirok etdi. Qolaversa, qatnashuvchilarning uchdan bir qismidan ko‘prog‘i o‘z tanlovi haqida pochta orqali xabar bergan. Bu qadar yuqori ulush shu bilan izohlanadiki, ovoz berish konvertlari fuqarolarga tarixda ilk bor ularning so‘rovisiz pochta orqali yuborildi.

Myunxendagi oldingi ishtirok rekordi 2001 yilda o‘rnatilgan bo‘lib, o‘shanda Frettmaning tumanida yangi stadion qurish-qurmaslik masalasi muhokama qilingan referendumda qatnashish darajasi 37,5 foizni tashkil etgan edi.

Olimpiada va Paralimpiadani o‘tkazish tashabbuskorlari bu o‘yinlarni “Yurak va ruh bilan o‘yinlar” hamda qisqa masofali, ekologik toza musobaqalar sifatida targ‘ib qilmoqda. Tashkiliy qo‘mita ma’lumotiga ko‘ra, musobaqalar uchun mo‘ljallangan inshootlarning 90 foizi Olimpiya qishlog‘idan 30 km masofadan uzoq bo‘lmagan hududda joylashgan, Olimpiya qishlog‘i uchun joy Myunxenning shimoliy-sharqiy qismida tanlangan.

Shu bilan birga, zarur obektlarning ko‘pchiligi allaqachon mavjud. Ayrimlari modernizatsiya yoki kengaytirishni talab qiladi, faqatgina kam qismi noldan qurilishi lozim. Tashabbus tarafdorlari Myunxendagi o‘yinlar iqtisodiyotga, uy-joy qurilishiga, infratuzilmaga, shahar kayfiyatiga va Germaniyaning jahondagi imijiga ijobiy ta’sir ko‘rsatishini kutmoqda.

Myunxenning arizasiga qarshi chiquvchilar esa o‘yinlar juda qimmatga tushishini ta’kidlaydi. Myunxen Texnika universiteti (TUM) mutaxassislari zarur xarajatlarni 18–21 milliard yevro deb baholagan. Tashabbus tanqidchilari shuningdek kutilmagan holatlar yanada yuqori xarajatlarga olib kelishidan ogohlantiradi. Ular, shuningdek, Myunxen arizasi ma’qullansa, shaharda uy-joy narxlari va yashash qiymati oshib ketishidan xavotir bildirmoqda.