Qoʻshimcha funksionallar
-
Tungi ko‘rinish
Xitoylik ishbilarmonlar Toshkentda: agrosektor eksportini oshirish muhokama qilindi
Guandun provinsiyasining Guangdong General Chamber of Commerce palatasi ijrochi prezidenti Go Yuy Kun boshchiligidagi delegatsiya O‘zbekistonga biznes-missiya bilan tashrif buyurdi. Uchrashuvlarda qo‘shma investitsiyaviy loyihalar va Xitoy bozoriga qishloq xo‘jaligi mahsulotlari eksportni kengaytirish istiqbollari muhokama etildi.
Foto: Dunyo
O‘zbekiston Bosh konsulxonasi ma’lumotiga ko‘ra, delegatsiya safar davomida Investitsiyalar, sanoat va savdo vazirligi, Toshkent shahar hokimligi hamda Milliy iqtisodiy hamkorlik uyushmasi vakillari bilan muzokaralar o‘tkazdi. Tomonlar agrar ishlab chiqarishni chuqur qayta ishlash, logistika va sovuq zanjir infratuzilmasini takomillashtirish, eksport standartlari va sertifikatlash talablarini uyg‘unlashtirish masalalarini ko‘rib chiqdi.
Biznes-missiya a’zolari Toshkent shahridagi kichik sanoat zonalarida bo‘lib, investorlar uchun yaratilgan shart-sharoitlar, yer uchastkalari taqsimoti, bojxona- soliq imtiyozlari va injyener-kommunikatsiya tarmoqlari bilan tanishdi.
Safar yakunlariga ko‘ra, O‘zbekiston Milliy iqtisodiy hamkorlik uyushmasi va Guangdong General Chamber of Commerce o‘rtasida hamkorlik memorandumi imzolandi. Hujjat doirasida agroeksportni ko‘paytirish, tayyor oziq-ovqat mahsulotlari va xomashyo yetkazib berishni diversifikatsiya qilish, qo‘shma qiymat zanjirlarini yaratish rejalashtirilgan.
Ma’lumot uchun, Guangdong General Chamber of Commerce 2003 yilda tashkil etilgan bo‘lib, 2 mingga yaqin kompaniya manfaatlarini himoya qiladi.
