Tergov va prokuror nazorati elektron shaklga o‘tkaziladi

Prezidentning 2025 yil 3 noyabr kuni imzolangan PF–204-son farmoni bilan “Raqamli prokuratura – 2030” strategiyasi tasdiqlandi. Hujjatga ko‘ra, tergov va prokuror nazorati jarayonlari bosqichma-bosqich elektron shaklga o‘tkaziladi, prokuratura faoliyati to‘liq raqamli transformatsiya qilinadi.

Foto: iStock

Farmon prokuratura organlari faoliyatida ochiqlik, samaradorlik va javobgarlikni oshirishni maqsad qiladi. Asosiy yo‘nalishlar quyidagicha:

2030 yilgacha avtomatlashtirish: prokuratura organlari faoliyatining barcha yo‘nalishlari ilg‘or xalqaro tajriba asosida raqamlashtiriladi;
elektron tergov va nazorat: tergov harakatlari hamda prokuror nazorati to‘liq elektron formatga o‘tkaziladi;
Raqamli prokuror AT-kompleksi: yagona platforma orqali ma’lumot almashish, tahlil va qaror qabul qilish tezkorligi oshiriladi;
masofaviy qonuniylik nazorati: davlat organlari qabul qilayotgan hujjatlarning Konstitutsiya va qonunlarga muvofiqligi elektron tarzda, real vaqtda monitoring qilinadi;
tekshiruvlarni raqamlashtirish: nazorat qiluvchi organlar tadbirlarida qonunlarga rioya etilishini kuzatish uchun Tekshiruvlarning yagona elektron reyestri'ning sinov versiyasi ishlanadi, 2026 yil 1 dekabrdan to‘liq versiyasi ishga tushiriladi.

Kutilayotgan natijaga ko‘ra, yangi tizim huquqbuzarliklarni ilk bosqichda aniqlash, inson omili ta’sirini kamaytirish, ortiqcha qog‘ozbozlikni qisqartirish va jamoatchilik uchun shaffoflikni kuchaytirishga xizmat qiladi.