Ichki aviareyslar, go‘sht, nikoh uzugi. Yillik hisobda eng ko‘p qimmatlashgan mahsulotlar va xizmatlar

Markaziy bank 2025 yilning oktabr oyi holatiga inflatsiya ko‘rsatkichlarini e’lon qildi.

Umumiy yillik inflatsiya 2022 yilda 12,3 foiz bo‘lgan, 2023 yilda pasayib, 8,8 foiz, 2024 yilda biroz oshib, 9,8 foiz, 2025 yil oktyabr holatida 7,8 foizga tushgan.

Oziq-ovqat mahsulotlari

Infografikaga ko‘ra, ba’zi oziq-ovqatlar narxi sezilarli darajada pasaygan, boshqalari esa keskin oshgan:

Yillik hisobda shaftoli (-28,7 foiz), tarvuz (-21,8 foiz), bulg‘or qalampiri (-19,7 foiz), uzun boshoqli guruch (-18,3 foiz), yumaloq boshoqli guruch (-18,2 foiz), bodring (-17 foiz), banan (-15,1 foiz) va sarimsoq(-14,7 foiz) narxlari sezilarli darajada pasaydi.

Hisobot davrida quyidagi mahsulotlar narxlari sezilarli qimmatlagan:

• Suyaksiz mol go‘shti (+25,3 foiz);
• Karam (+24,7 foiz);
• Suyakli mol go‘shti (+24,2 foiz);
• Kungaboqar moyi (+22,6 foiz);
• Piyoz (+18,9 foiz);
• Kartoshka (+17,9 foiz);
• Mol va qo‘y jigari (+17,2 foiz);
• Qiyma (17 foiz).

Iste’mol narxlari indeksi savatidagi umumiy 170 turdagi oziq-ovqat mahsulotlaridan 150 tasining (88 foiz) yillik narx o‘sishi 10 foizdan past bo‘ldi.

Nooziq-ovqat tovarlar

Nooziq-ovqat mahsulotlaridan propan (-18 foiz), A4 qog‘oz (-3,9 foiz), yirik oshxona jihozlari (-3,5 foiz), konditsioner (-1,3 foiz), ovqat tayyorlash uchun priborlar (-1 foiz) va televizor (-0,3 foiz) arzonlagan.

Oltin narxlari global bozorda rekord darajada qimmatlashi zargarlik buyumlarida ham aks etgan – nikoh uzugi 33,4 foizga qimmatlagan.

Shuningdek, nooziq-ovqat mahsulotlari tarkibida metan (+30,5 foiz), gazeta (+15,3 foiz), benzin (+11,7 foiz), dezodorant (+10,3 foiz), tabiiy gullar (9,8 foiz) narxlarida keskin qimmatlashish kuzatilgan.

Iste’mol narxlari indeksidagi 250 turdagi nooziq-ovqat mahsulotlarining 243 tasi (97 foiz) bo‘yicha yillik narx o‘sishi 10 foizdan kam bo‘lgan.

Xizmatlar

Yillik hisobda pul o‘tkazmalari uchun haq to‘lash narxlari 4,8 foizga, mikromoliyaviy xizmatlar 0,2 foizga arzonladi.

Narxi eng ko‘p qimmatlagan xizmat ichki aviareyslar bo‘ldi – hisobot davrida bu xizmat narxi 52,3 foizga oshgan. Shuningdek, tarmoq gaz (+39,2 foiz), sovuq suv (+35,1 foiz), muzey xizmatlari (+32,3 foiz), chiqindi tashlash (+28,6 foiz), suyultirilgan gaz (+25 foiz), shahar avtobusida yo‘l haqi (+22,3 foiz), davlat bog‘chasi (+21 foiz), markaziy isitish (+20,9 foiz), elektr energiyasi (+18,8 foiz) narxlarida ham keskin qimmatlashish kuzatilgan.

Iste’mol narxlari indeksidagi 90 turdagi xizmatlarning 59 tasi (66 foiz) bo‘yicha yillik narx o‘sishi 10 foizdan past bo‘lgan.