Qamchiq va Darband dovonlarida qatnaydigan tezyurar poyezdlar Janubiy Koreyadan xarid qilinadi

Toshkentdan vodiyga, Qashqadaryodan Surxondaryoga dovon orqali o‘tgan temiryo‘llarda harakatlanadigan yangi tezyurar poyezdlar Janubiy Koreyadan xarid qilinadi.

Transport vaziri Ilhom Mahkamov ma’lum qilishicha, Janubiy Koreyaning Hyundai Rotem kompaniyasidan 6 ta tezyurar harakat tarkibi sotib olinmoqda. Ularning ilk partiyasi joriy yilning dekabr oyidan boshlab O‘zbekistonga kela boshlaydi.

Ushbu poyezdlar kelasi yildan boshlab Buxoro — Miskin — Urganch — Nukus yo‘nalishlarida harakatlanishi rejalashtirilgan.

“O‘zbekiston temiryo‘llari” rahbari Zufar Narzullayevning ta’kidlashicha, tog‘li hududlardagi temiryo‘llar — jumladan, Qamchiq va Darband dovonlari orqali o‘tuvchi yo‘nalishlar uchun 2030 yilgacha yana 8 ta tezyurar poyezd xarid qilinishi ko‘zda tutilgan.

Anglashilishicha, yangi harakat tarkiblari yo‘lovchilar uchun qulaylikni oshirish, sayohat vaqtini qisqartirish va tog‘li yo‘nalishlarda temiryo‘l infratuzilmasini yanada zamonaviylashtirishga xizmat qiladi.