Tergov hibsxonalaridagi sharoitlar yengillashishi mumkin

Oliy Majlis Qonunchilik palatasining navbatdagi majlisi bo‘lib o‘tdi. Unda deputatlar Oliy Majlisning Inson huquqlari bo‘yicha vakili (ombudsman)ning “Jinoyat ishini yuritish chog‘ida qamoqda saqlash to‘g‘risida”gi O‘zbekiston Respublikasi qonuniga qo‘shimchalar kiritish to‘g‘risida”gi qonunchilik taklifini ko‘rib chiqdilar.

Loyiha tergov hibsxonalarida ushlab turilgan va qamoqqa olingan shaxslarning huquq va erkinliklarini ta’minlashga qaratilgan amaldagi normalarni takomillashtirishni nazarda tutadi.

Xususan, quyidagi yangi imkoniyatlarni joriy etish taklif etilmoqda:

• bayram kunlarida toza havoda qo‘shimcha sayr qilish huquqini berish;
• yaqin qarindoshlari va boshqa shaxslardan kiyishga ruxsat etilgan kiyim-bosh va poyabzal olish imkoniyatini yaratish;
• har oyda oziq-ovqat va eng zarur narsalarni sotib olish uchun ruxsat etilgan pul miqdorini oshirish.

Qayd etilganidek, ushbu o‘zgarishlar qamoqqa olingan shaxslarni axloqan tuzatish ishlari samaradorligini oshirish, ularning insoniy qadr-qimmatini hurmat qilish, shuningdek milliy qonunchilikni xalqaro standartlar va ilg‘or tajribaga muvofiqlashtirishga xizmat qiladi.

Majlis yakunida qonunchilik taklifi deputatlar tomonidan ma’qullandi va tegishli qaror qabul qilindi.