Hongkongda turar joy majmuasidagi yong‘in: kamida 44 kishi halok bo‘ldi

Chorshanba kuni kunduzi boshlangan yong‘in avvalo bambukdan yasalgan qurilish havozalarini qamrab olgan, shundan so‘ng baland qavatli uylarning tashqi qismi orqali tez sur’atda yoyilgan. O‘t kamida sakkizta binodan beshtasini to‘liq yoki qisman qamrab olgani aytilmoqda. Majmuada taxminan 4,5–4,8 ming kishi istiqomat qiladi. 

Halok bo‘lganlar orasida yong‘inni o‘chirishda ishtirok etgan bir nafar o‘t o‘chiruvchi ham bor – u ma’lum bir vaqtda jamoasi bilan aloqani yo‘qotgan, keyinchalik kuchli kuyish jarohatlari bilan topilgan. O‘nlab odamlar jarohat olgan, ulardan kamida 40–60 nafari og‘ir ahvolda ekani aytilmoqda. 

Hokimiyat yong‘inga eng yuqori – beshinchi darajali xavf toifasini berdi. Bunday toifa Hongkongda so‘nggi marta 2008 yilda qo‘llangan edi, mutaxassislar bu hodisani shaharning so‘nggi o‘n yilliklardagi eng halokatli yong‘inlaridan biri deya baholamoqda. 

Rasmiy sabab hanuz aniqlanmagan. Ammo yong‘inning bambuk havozalar va tashqi devor materiallari orqali g‘ayrioddiy tez sur’atda tarqalgani qayd etilmoqda. Mahalliy OAV ma’lumotlariga ko‘ra, ayrim aholi bugunga qadar qurilishda ishlayotgan ishchilarning chekkani haqida shikoyat qilib kelgan. Politsiya yong‘in bilan bog‘liq holda uch nafar erkakni gumonlanuvchi sifatida qo‘lga olgan. 

Hongkong dunyoning aholi eng zich yashaydigan shaharlaridan biri bo‘lib, yuzlab baland qavatli uylardan iborat. Ilgari o‘ta halokatli yong‘inlar ko‘p uchrardi, ammo oxirgi o‘n yilliklarda yong‘in xavfsizligi qoidalari kuchaytirilgani sabab bunday yirik fojialar kamaygan. Hozirgi voqea esa xavfsizlik standartlari va qurilish ishlari ustidan nazorat masalasini yana kun tartibiga chiqarmoqda.