Hongkongdagi dahshatli yong‘in qurbonlari 65 nafarga yetdi - fotolar

Hongkong shimolidagi 32 qavatli binolarda kelib chiqqan yong‘in 24 soatdan keyin ham to‘liq jilovlanmadi: kuchli alanga qutqaruvchilar ishini qiyinlashtirmoqda. Qurbonlar soni 65 kishiga yetdi, yana yuzlab insonlar bilan aloqa yo‘qolgan. Hukumat maxsus yordam fondini ochdi, majmuani ta’mirlayotgan kompaniyaning 3 nafar rasmiysi hibsga olingan.

{Yii::t(}

O'tkazib yuborish 6s

26 noyabr – chorshanba kuni tushdan so‘ng Hongkong shimolidagi turar joy majmuasida katta yong‘in boshlangan edi. Hamon to‘liq o‘chirilmagan yong‘in oqibatida kamida 65 kishi vafot etgan, qariyb 300 kishi bedarak yo‘qolgan, deb yozmoqda Associated Press.

Tay Po tumanida joylashgan Wang Fuk Court turar joy majmuasining yuqori qavatlarida qolib ketgani taxmin qilinayotgan odamlar oldiga borish qiyinlashgan. O‘t o‘chiruvchilar deyarli bir sutkadan buyon yonayotgan binolardan chiqayotgan kuchli issiqlik va quyuq tutun sabab qiyinchilikka duch kelmoqda.

Yong‘in nimadan kelib chiqdi?

Shimoldagi Tay Po tumanida aholi uzoq muddatdan beri arzon uy-joy tanqisligidan aziyat chekadi. Shu sababli bu yerda ko‘p uylar juda zich qurilgan. Xususan, yong‘in chiqqan majmuada 8 ta blok bo‘lib, undagi 2 000 ta xonadonda 4,6 mingdan ortiq aholi istiqomat qilgan.

Voqea joyidan olingan dastlabki videolarda binolarning tashqi tarafi – bambukdan qurilgan yengil konstruksiya va yashil qurilish to‘ri bilan o‘ralgani ko‘rinadi. Ma’lum bo‘lishicha 1980 yillarda qurilgan binoda katta ta’mirlash ishlari o‘tkazilayotgan bo‘lgan.

Yong‘in binoning tashqi qismida boshlangan, so‘ng bambuk konstruksiyalar va qurilish to‘ri orqali binoning ichiga va boshqa binolarga tarqalgan. Ehtimol shamolli ob-havo alangani kuchaytirib yuborgan bo‘lishi mumkin.

Rasmiylar baland binolarning tashqi devorlarida ishlatilgan ayrim materiallar yong‘inga chidamlilik standartlariga javob bermaganini ham taxmin qilmoqda. Bu esa yong‘inning g‘ayritabiiy tez tarqalishiga imkon bergan.

Politsiya aytishicha, yong‘indan ta’sirlanmagan yana bir binoda ham qurilish kompaniyasi o‘rnatgan «ko‘pikli material bilan muhrlangan» ba’zi derazalar topilgan.

Qurbonlar ortishi ehtimoli katta

Payshanba tongiga kelib, rasmiylar yong‘in qamrab olgan to‘rt blok ustidan nazorat o‘rnatilganini, yana uchta blokdagi operatsiya davom etayotganini aytdi. Payshanba tushgacha 55 nafar qurbon aniqlangan. Ular orasida bir o‘t o‘chiruvchi ham bor. Yana 70 dan ortiq inson kuyish va tutundan zaharlanish oqibatida kasalxonalarga yotqizilgan.

Associated Press nashriga intervyu bergan, shu uyda yashovchi Lourens Li xotini bilan bo‘lgan voqeani aytib berdi.

«Yong‘in boshlanganida men unga qo‘ng‘iroq qilib, qochishini aytdim. Ammo u kvartirani tark etganda yo‘lak va zinapoyalar tutun bilan to‘lgan va hammasi qorong‘i bo‘lib qolgan. Shuning uchun u majburan yana kvartiraga qaytgan», dedi tun bo‘yi boshpanada qolgan Li.

Majmua binolaridan evakuatsiya qilingan boshqalar ham o‘z uylaridan xavotirda va uyqusiz tunni o‘tkazgan. «Men butunlay uxlay olmadim», deydi 75 yoshli Vinter Chung.

Video: https://x.com/i/broadcass/1ypKdqNBrgqGW

«Ustuvor vazifa — yong‘inni o‘chirish va qamalib qolgan aholini qutqarish. Ikkinchisi — jarohat olganlarga yordam berish. Keyin qo‘llab-quvvatlash va tiklash. Shundan so‘ng esa to‘liq tergov boshlaymiz», dedi dedi Hongkong rahbari Jon Li.

Uning aytishicha, ichkarida qolib ketgani taxmin qilinayotgan 279 kishi bilan aloqa o‘rnatilmagan, qutqarilgan 900 kishi esa sakkizta boshpanalarga joylashtirilgan.

3 kishi qamoqqa olindi

Hongkong politsiya rasmiysi Eyilin Chungning jurnalistlarga aytishicha, yong‘indan so‘ng qurilish-ta’mirlash kompaniyasining ikki direktori va bir muhandis maslahatchisi hibsga olingan. Ular yong‘in bo‘yicha ehtiyotsizlik oqibatida odam o‘limiga sabab bo‘lganlikda gumon qilinmoqda.

«Bizda kompaniya mas’ullarining qo‘pol beparvolik qilganiga, bu esa ushbu falokatga va yong‘inning nazoratsiz tarqalishiga, katta talafotlar yuzaga kelishiga olib kelganiga asos bor», dedi politsiya rasmiysi.

AP nashrining tasdiqlashicha, majmua binolaridagi ta’mirlash ishlariga mas’ul bo‘lgan Prestige Construction & Engineering Company ofisida tintuv o‘tkazilgan. Politsiya ko‘plab hujjatlar solingan qutilarni dalil sifatida olib chiqib ketgan.

Norozilik va reaksiyalar

Hongkong 1997 yilda Buyuk Britaniyadan Xitoy tarkibiga qaytarilgan va Pekin tomonidan «Maxsus ma’muriy hudud» shaklida boshqariladi. Fojiadan so‘ng Xitoy davlat telekanali Si Jingpingning «bor kuch bilan yong‘inni o‘chirish va talafotlarni kamaytirishni buyurgani» haqidagi xabarni e’lon qildi.

Ko‘plab mahalliy aholi vakillari tarmoqlarda yong‘in sababi sifatida – e’tiborsizlik va xarajatlarni tejashni ko‘rsatib, tanqidlar bildirishni boshlagan.

27 noyabr kuni tushdan so‘ng Hongkong hukumati turar joy majmuasi aholisi uchun 38,5 million AQSh dollari miqdorida yordam fondi tashkil qilinishini bildirdi. Bundan tashqari, ushbu uydagi har bir uy xo‘jaligiga payshanba kuni 1200 dollardan favqulodda yordam puli beriladi.

Hongkong Transport departamenti aytishicha, bugun ham yong‘in bo‘layotgan hududdagi bir nechta yo‘llar yopiq qoladi va 39 avtobus yo‘nalishi o‘zgartirilgan. Yong‘in va tirbandlik sabab kamida olti maktab payshanba kunidan yopilgan.

Aslida qurilish va ta’mirlashda qo‘llangan yashil qurilish to‘ri va bambukli konstruksiyalar – an’anaviy Xitoy qurilishining asosiy unsurlaridan bo‘lgan. Lekin Hongkongda xavfsizlik sabab mart oyidan boshlab undan foydalanish bosqichma-bosqich bekor qilinayotgan edi.

Politsiyaga ko‘ra, rasmiylar shahar bo‘ylab katta ta’mir ostidagi barcha turar joy majmualarida darhol tekshiruvlar o‘tkazishni boshlagan. Unda bambukli konstruksiyalar va qurilish materiallarining xavfsizlik standartlariga mosligi tekshiriladi.