Liyepaya va Klaypeda portlari orqali o‘zbek mahsulotlari Yevropaga yetkazilishi mumkin

O‘zbekiston eksport va investitsiya salohiyatini yanada targ‘ib qilish maqsadida Andijon viloyatining yirik to‘qimachilik korxonalari rahbarlaridan iborat delegatsiyaning Latviya va Litvaga ishchi tashrifi amalga oshirildi. Bu haqda “Dunyo” AA xabar berdi.

Tashrif doirasida elchixona tomonidan biznes-forum, tadbirkorlar o‘rtasida B2B formatida ikki tomonlama uchrashuv va muzokaralar tashkil etildi. Uchrashuvlarda Latviya biznes vakillari Andijon viloyati to‘qimachilik sohasi mahsulotlariga katta qiziqish bildirdi.

Muzokaralar davomida logistika yo‘nalishlarini optimallashtirish, barqaror yetkazib berishni ta’minlash hamda o‘zbek mahsulotlarini Boltiqbo‘yi mamlakatlarining yetakchi savdo maydonlariga chiqarish masalalari muhokama qilindi. Mezbon tomon vakillariga O‘zbekistonning investitsion va sanoat salohiyatiga doir prezentatsiya materiallari, shuningdek, to‘qimachilik korxonalarining batafsil mahsulot kataloglari taqdim etildi.

Shuningdek, Latviyaning Liyepaya va Litvaning Klaypeda port shaharlariga tashrif davomida delegatsiya vakillari o‘zbek to‘qimachilik mahsulotlarini G‘arbiy va Shimoliy Yevropaga o‘z vaqtida yetkazib berishni ta’minlash hamda uzluksiz logistika uchun omborxonalar tashkil etish imkoniyatlarini o‘rgandilar.

Tashrif yakunida Riga shahrining markaziy tumanlarida to‘rtta ixtisoslashtirilgan o‘zbek to‘qimachilik mahsulotlari shou-rumi, Vilnyus shahrida esa bitta shou-rum ochildi. Qayd etilishicha, safari yakunlari bo‘yicha taraflar o‘rtasida qiymati 10 million dollardan ortiq eksport shartnomalari imzolandi.