«Toshshahartransxizmat» avtobus shinalari holati yuzasidan rasmiy munosabat bildirdi

Ijtimoiy tarmoqlarda King Long rusumli avtobuslarning avtoshinalari holati qoniqarli emasligi aks etgan videolavhalar tarqaldi. Mazkur holat yuzasidan «Toshshahartransxizmat» AJ qator ma’lumotlarni taqdim etdi.

Jamiyat bildirishicha, Xitoy Xalq Respublikasidan xarid qilingan King Long va Yutong rusumli avtobus va elektrobuslarni tasarruf etish bir vaqtda boshlangan. Shu bois, har yili kuz-qish mavsumida ushbu avtobus va elektrobuslardagi avtoshinalarni ommaviy ravishda almashtirish davri hisoblanadi.

Qayd etilishicha, «Toshshahartransxizmat» AJ tomonidan avtoshinalarga bo‘lgan ehtiyojni qoplash maqsadida ularni o‘rnatilgan tartibda almashtirish ishlari joriy yilning yoz mavsumidan boshlab amalga oshirilmoqda.

Shuningdek, hozirgi kunda avtoshinalarni bosqichma-bosqich xarid qilish va ularni yangilariga almashtirish bo‘yicha tegishli choralar ko‘rilayotgani, mazkur masala «Toshshahartransxizmat» AJ tomonidan doimiy nazoratda ekani ma’lum qilindi.