O‘zbekistonda radioaktiv chiqindilarni ko‘mish oldidan baholash talablari joriy etiladi

O‘zbekiston prezidenti farmoni ijrosini ta’minlash maqsadida Vazirlar Mahkamasi huzuridagi Sanoat, radiatsiya va yadro xavfsizligi qo‘mitasi atom energiyasidan foydalanish sohasida radioaktiv chiqindilarni ko‘mishdan oldin xavfsizlikni baholashga qo‘yiladigan talablarni tasdiqlash to‘g‘risida qaror qabul qilishni rejalashtirmoqda.

Qaror loyihasiga ko‘ra, radioaktiv chiqindilarni ko‘mishga qadar ularni to‘plash, saralash, qayta ishlash, konditsiyalash va saqlash jarayonlarida xavfsizlikni ta’minlash bo‘yicha yagona talablar belgilanadi. Hujjatda xavfsizlik baholashi obektning to‘liq “hayotiy davri” — joylashtirish va loyihalashtirishdan tortib, foydalanish, rekonstruksiya, ta’mirlash, transportda tashish hamda foydalanishdan chiqarish bosqichlarigacha amalga oshirilishi lozimligi qayd etilgan.

Talablarga muvofiq, xavfsizlikni baholash normal ish rejimida ham, normal foydalanish izdan chiqqan holatlarda, jumladan avariyalar vaqtida yuzaga kelishi mumkin bo‘lgan radiatsiyaviy ta’sirning xodimlar, aholi va atrof-muhit uchun maqbulligini asoslab berishi shart. Bu jarayon sanitar qoidalar va me’yorlar talablariga muvofiq amalga oshirilishi ko‘zda tutilgan.

Shuningdek, radioaktiv chiqindilar bilan muomalada bo‘lishda “gradatsiyalangan yondashuv” qo‘llanib, talablar va nazorat darajasi chiqindilarning potensial xavfliligi hamda mumkin bo‘lgan oqibatlarga mutanosib belgilanishi nazarda tutilmoqda. Xavfsizlikni baholash deterministik va ehtimoliy tahlil usullari yoki ularning uyg‘unligi asosida o‘tkazilishi mumkin.

Qaror loyihasi Sog‘liqni saqlash vazirligi, Favqulodda vaziyatlar vazirligi, Vazirlar Mahkamasi huzuridagi Atom energiyasi agentligi va Fanlar akademiyasi bilan kelishilgani qayd etilgan.