Ijtimoiy himoya milliy agentligi tomonidan Navoiy va Xorazm viloyatlaridagi «Inson» ijtimoiy xizmatlar markazlari huzurida Bolani kompleks baholash guruhlari tashkil etilmoqda.
Guruhlar 3-18 yoshdagi bolalarning alohida taʼlim ehtiyojlarini aniqlaydi, ularga mos taʼlim shakli va zarur qoʻllab-quvvatlash choralarini belgilaydi hamda davlat taʼlim muassasalariga yoʻnaltiradi.
Tizim uch bosqichda: 1-oktabrdan - Navoiy va Urganch shaharlarida, 1-noyabrdan - Karmana, Qiziltepa, Konimex, Yangibozor, Qoʻshkoʻpir tumanlari va Xiva shahrida, 1-dekabrdan - ikki viloyatning qolgan tuman va shaharlarida joriy etiladi.
Hududlarga jami 12 ta kompleks baholash guruhi xizmat koʻrsatadi.
Baholash jarayonida maxsus pedagog, psixolog va mahalladagi ijtimoiy xodim bolaning taʼlim olish imkoniyatlari, rivojlanishi, muloqoti, xulq-atvori, oilaviy va ijtimoiy muhitini kompleks oʻrganadi. Jarayonda ota-ona yoki qonuniy vakil ishtirok etadi, zaruratga koʻra tibbiyot mutaxassislari ham jalb qilinadi.
