O‘zbekiston JST a’zosi bo‘lish uchun faqat bir davlat bilan muzokarani yakunlashi qoldi

O‘zbekiston Jahon savdo tashkilotiga (JST) a’zo bo‘lish uchun faqat bir davlat bilan ikki tomonlama muzokarani yakunlashi kerak. Bu haqda prezidentning JST bo‘yicha vakili Azizbek Urunov ma’lumot berdi. Avvalroq, u bu davlat Tayvan ekanini aytgan edi.

Qayd qilinishicha, 2025 yilda JST a’zosi bo‘lgan 34 davlatdan 33 tasi bilan ikki tomonlama muzokaralar yakunlandi. Jumladan, Yevropa Ittifoqi, Xitoy, Rossiya, Buyuk Britaniya, Shveytsariya, Kanada, Avstraliya va boshqa yirik savdo hamkorlari bilan kelishuvlarga erishildi.

Shuningdek, JST talablariga muvofiq 30 ta normativ-huquqiy hujjat qabul qilindi, jumladan: 4 ta qonun, prezidentning 8 ta farmoni va qarorlari, Vazirlar Mahkamasining 12 ta qarori, 6 ta idoraviy hujjat, qo‘shimcha ravishda 29 ta normativ-huquqiy hujjat loyihasi tayyorlandi.

Ta’kidlanishicha, bojxona tartibotlari, eksport bojlari, savdoni himoya qilish choralari, intellektual mulk huquqlarini himoya qilish, texnik tartibga solish, sanitariya va fitosanitariya hamda savdodagi texnik to‘siqlar (SPS va TBT) sohalarida kompleks islohotlar amalga oshirildi.

Urunovning so‘zlariga ko‘ra, 2026 yil uchun ustuvor vazifalar: Tayvan bilan ikki tomonlama muzokarani yakunlash, ko‘p tomonlama muzokaralar va Ishchi guruh hisobotini tugatish, qonunchilikni to‘liq muvofiqlashtirish va O‘zbekistonning JST a’zosi bo‘lish jarayonini yakuniga yetkazish.