“Veymar uchburchagi” Parijda Kiyevni qo‘llab-quvvatlash masalasini muhokama qildi

Parijda Ukraina uchun xavfsizlik kafolatlari masalasi bo‘yicha “ko‘ngillilar koalitsiyasi” uchrashuvi bo‘lib o‘tganidan bir kun o‘tib, ayni shu mavzu Fransiya poytaxtidagi “Veymar uchburchagi” muzokaralarining kun tartibiga ham kiritildi. Germaniya tashqi ishlar vaziri Yoxann Vadeful 7 yanvar, chorshanba kuni Parijda fransuz va polyak hamkasblari — Jan-Noel Barro va Radoslav Sikorskiy bilan uchrashdi.

Rossiyaning Ukrainaga keng ko‘lamli hujumi boshlanganidan keyin “Veymar uchburchagi” formatida hamkorlikni faollashtirgan uch davlat tashqi ishlar vazirlari urushni o‘z shartlari asosida yakunlashni talab qilayotgan Kiyevga keyingi qo‘llab-quvvatlash masalalarini muhokama qilmoqda. Bundan tashqari, “Veymar uchburchagi” vakillari Hindiston tashqi ishlar vaziri Subramanyam Jayshankar bilan ham muzokara o‘tkazadi.

Bu orada Ukraina prezidenti Volodimir Zelenskiy Yevropa sheriklarining aniq majburiyatlari yo‘qligidan ko‘ngli qolganini bildirdi. “Menga oddiy javob kerak: ha, agar yana bir hujum bo‘lsa, barcha sheriklar Rossiyaga kuchli javob beradi”, — dedi Zelenskiy 7 yanvar kuni. Uning aytishicha, hozirgacha u bu savolga “aniq” javob olmagan.

Parijda 6 yanvar kuni bo‘lib o‘tgan uchrashuvda “ko‘ngillilar koalitsiyasi”ga kiruvchi davlatlar Ukraina uchun xavfsizlik kafolatlari haqida deklaratsiyani imzoladi. Fransiya prezidenti Emmanuel Makron shunday dedi: “Bugun biz sezilarli ilgarilashga erishdik, bu Parij deklaratsiyasida aks etgan — u barqaror tinchlik uchun ishonchli kafolatlarni taqdim etadi. Ushbu ‘ko‘ngillilar koalitsiyasi’ bayonotida ilk bor birlashmaga kiruvchi 35 davlat, shuningdek Ukraina va AQSh o‘rtasida tezkor yaqinlashuv tan olinadi. Biz ishonchli xavfsizlik kafolatlari haqida gapiryapmiz”.

U kelishilgan bandlarni alohida-alohida sanab o‘tdi. Ular orasida — AQSh rahbarligida o‘t ochishni to‘xtatishni monitoring qilish, Ukrainani mudofaa uchun uzoq muddatli qurol-yarog‘ bilan ta’minlash, shuningdek kelajakda Rossiya tomonidan qayta hujum bo‘lsa, Ukrainani qo‘llab-quvvatlash bo‘yicha majburiy kuchga ega kelishuvlarni qabul qilish ustida ishlash kabi masalalar bor.

Bundan tashqari, Kiyev, Parij va London niyatlar deklaratsiyasini ham imzoladi. Buyuk Britaniya bosh vaziri Kir Starmerning so‘zlariga ko‘ra, bu hujjat o‘t ochish to‘xtatilgandan keyin Ukrainada britan, fransuz va boshqa “sherik” qo‘shinlarni joylashtirish uchun “huquqiy asos” yaratadi. “Bu Ukrainaga uzoq muddatli istiqbolda ko‘mak berish bo‘yicha qat’iy majburiyatimizning eng muhim qismi”, — deya Starmer so‘zlarini keltiradi uning ofisi. Bosh vazir, shuningdek, o‘t ochishni to‘xtatish rejimi boshlanishi bilan Buyuk Britaniya va Fransiya butun Ukraina bo‘ylab “harbiy markazlar” tashkil etishini hamda “qurol va harbiy texnika saqlash uchun himoyalangan obektlar qurish”ini aytdi.