Nukus va Xo‘jaylida “opiy” savdosi fosh etildi: 1 kgdan ortiq modda musodara qilindi

DXX Qoraqalpog‘iston Respublikasi bo‘yicha boshqarmasi va IIV tezkor xodimlari hamkorligida giyohvandlik vositalarining noqonuniy aylanmasiga qarshi kurashish doirasida Nukus shahrida tezkor tadbir o‘tkazildi.

Tadbir davomida 1972 yilda tug‘ilgan, muqaddam sudlangan mahalliy fuqaro 9 gramm “opiy” moddasini Shumanay tumanida yashovchi, 1965 yilda tug‘ilgan shaxsga 4 million so‘mga sotgan vaqtida ushlanib, uning noqonuniy harakatlariga chek qo‘yildi. Shuningdek, narkosavdogarning yonidan qo‘shimcha 5 gramm “opiy” ham ashyoviy dalil sifatida olingan.

O‘rganishlar natijasida, mazkur giyohvandlik vositasi 1981 yilda tug‘ilgan, muqaddam giyohvandlik vositalari savdosi bilan bog‘liq jinoyati uchun sudlangan tanishidan olingani aniqlangan. Holat yuzasidan tezkor tadbir Xo‘jayli tumanida davom ettirilib, ushbu shaxs 20 gramm “opiy”ni 8 million so‘mga sotgan vaqtida qo‘lga olingan.

Bundan tashqari, unga tegishli sumkadan 1 kilogramm 176 gramm “opiy” moddasi ham topilib, musodara qilingan. Ma’lum bo‘lishicha, mazkur giyohvandlik vositasi Tojikistondan kontrabanda yo‘li bilan olib kelingan.

Qayd etilishicha, uch nafar qonunbuzarga nisbatan O‘zbekiston Jinoyat kodeksining 28, 246-moddasi 2-qismi va 273-moddasi 5-qismi bilan jinoyat ishi qo‘zg‘atilib, “qamoq” ehtiyot chorasi qo‘llangan. Qonunchilikka muvofiq, bunday jinoyatlarni sodir etgan shaxslar 10 yildan 20 yilgacha ozodlikdan mahrum etilishi mumkin.