186 mlrd so‘m o‘zlashtirilgan. Abdullayev va Tursunov qanday jinoyatda ayblanayotgani ochiqlandi

O‘zbekistonda 53 trillion so‘mlik talon-toroj va moliyaviy kamchiliklar fosh etildi, korrupsiya sxemalaridan yetkazilgan zarar 4,2 trillion so‘mni tashkil etdi. Bu haqda prezident Shavkat Mirziyoyev 27 yanvar kuni bo‘lib o‘tgan yig‘ilishda ma’lum qildi.

«Bilib qo‘yinglar, davlatning har bir so‘mi bo‘yicha ta’sirchan nazorat o‘rnatiladi. Javobgarlik muqarrar, jazo qattiq bo‘ladi!» – deb ta’kidladi u.

Davlat rahbarining so‘zlariga ko‘ra, yaqinda Prezident administratsiyasi va davlat idoralarida komplayens va korrupsiyaga qarshi ichki nazorat tizimi yo‘lga qo‘yildi. Qisqa muddatda budjetga tushum, talon-toroj, moliyaviy kamchiliklar bo‘yicha 53 trillion so‘m va tashqi savdo operatsiyada 8 milliard dollardan ortiq qarzdorlik aniqlangani o‘ta ayanchli holat ekani qayd etildi.

Korrupsiyaviy sxemalar bo‘yicha 4,2 trillion so‘m zarar aniqlanib, 1,3 trillion so‘mi undirildi, 55 nafar shaxs qamoqqa olindi.

Misol tariqasida prezident Ichki ishlar vazirligi tizimidagi vaziyatni keltirdi: unga ko‘ra, davlat xaridlari davomida 186 mlrd so‘m budjet mablag‘larining o‘zlashtirilgani aniqlangan hamda bu ish doirasida ichki ishlar vazirining sobiq o‘rinbosari Bekmurod Abdullayev va Jazoni ijro etish departamenti sobiq boshlig‘i Rustam Tursunovga qarshi jinoiy ish qo‘zg‘atilgan.

Bundan oldinroq Kun.uz manbasi 2025 yil 3 noyabrida ishdan olingan Bekmurod Abdullayev va Rustam Tursunov bir ish doirasida tergov qilinayotgani va ehtiyot chorasi sifatida qamoqqa olingani haqida xabar bergandi.

Keyinroq «Daryo» nashri o‘z manbalariga tayanib ushbu sobiq mulozimlar yirik miqdordagi davlat mulklarini talon-toroj qilish, mansab vakolatini suiiste’mol qilish va yana boshqa holatlar bo‘yicha gumonlanib, ehtiyot chorasi sifatida qamoqqa olinganini, yetkazilgan zarar miqdori 100 mlrd so‘mdan ortiqligini xabar qilgandi.

Ta’kidlanishicha, davlat manfaatlariga bunday yirik miqdordagi zarar Toshkent shahri va viloyatlar markazlariga o‘rnatilayotgan yangi svetofor va boshqa yo‘l uskunalarini go‘yoki xorijdan import qilingan deya ko‘rsatib, aslida mahalliy mahsulotlarni o‘tkazish bo‘yicha tuzilgan jinoiy sxemalar orqali yetkazilgan.