Azizbek Ikromov vazirlikka ko‘tarildi

Muqaddam uchta vazirlikda o‘rinbosar sifatida ishlagan Ikromov so‘nggi yillarda Farg‘ona viloyati IIBni boshqarayotgandi.

Foto: Oliy Majlis Qonunchilik palatasi

Favqulodda vaziyatlar vaziri Botir Qudratxo‘jayev boshqa ishga o‘tayotgani munosabati bilan lavozimidan ozod etildi.

O‘zbekiston prezidenti farmoni bilan Azizbek Isroilovich Ikromov favqulodda vaziyatlar vaziri lavozimiga tayinlandi.

Azizbek Ikromov muqaddam uchta vazirlikda vazir o‘rinbosari bo‘lib ishlagan, bu uning faoliyatidagi to‘rtinchi vazirlik bo‘lmoqda: u 2017-2019 yillarda mudofaa vazirining tarbiyaviy va mafkuraviy ishlar bo‘yicha o‘rinbosari, 2019-2021 yillarda ichki ishlar vazirining jamoat tartibini muhofaza qilish bo‘yicha o‘rinbosari, 2020-2021 yillarda mahalla va oilani qo‘llab-quvvatlash vaziri o‘rinbosari, 2019-2023 yillarda ichki ishlar vazirining ma’naviy masalalar bo‘yicha o‘rinbosari lavozimlarida ishlagan.

2023 yil yozida prezidentning Farg‘ona viloyatiga tashrifi vaqtida ushbu viloyat IIB boshlig‘i lavozimiga o‘tkazilgandi.

General-mayor Botir Qudratxo‘jayev muqaddam prokuratura tizimida turli lavozimlarda mehnat qilgan, 2017-2020 yillarda Bosh prokuratura huzuridagi Majburiy ijro byurosi direktori lavozimida ishlagan. 2020 yildan Xorazm viloyatiga prokuror bo‘lgan, 2022 yilda bosh prokuror o‘rinbosari – harbiy prokuror lavozimiga tayinlangandi. U 2025 yil fevralidan buyon favqulodda vaziyatlar vazirligini boshqarib kelayotgandi.