Rossiya armiyasi Zaporijjya viloyatiga hujum qildi: uch kishi halok bo‘ldi

Rossiya dronlari Zaporijjya viloyatining Volnyansk shahridagi xususiy sektorga hujum qildi. Viloyat harbiy ma’muriyati rahbari Ivan Fedorov ma’lumotiga ko‘ra, RF zarbasi oqibatida uch kishi halok bo‘lgan. Yana bir kishi yaralangan.

Foto: Jose Colon/Anadolu Agency/IMAGO

Payshanba, 29 yanvarga o‘tar kechasi Rossiyaning Zaporijjya viloyatiga qilgan hujumi natijasida uch kishi halok bo‘ldi. “Rossiyaliklar Volnyanskdagi xususiy sektorga dronlar bilan zarba berdi. Uylar vayron bo‘ldi, yong‘inlar kelib chiqdi. Afsuski, ikki ayol va bir erkak halok bo‘ldi, yana bir erkak yaralandi. Unga zarur barcha tibbiy yordam ko‘rsatilmoqda”, — deb yozdi Telegram’da viloyat harbiy ma’muriyati rahbari Ivan Fedorov.

Ukraina Qurolli kuchlari Havo kuchlari Zaporijjyaga boshqariladigan aviatsion bombalar uchirilgani haqida ma’lum qildi. “Suspіlne” telekanali ham dronlar hujumi tahdidi fonida Xmelnitskiy viloyatida portlash ovozlari eshitilgani haqida xabar bergan.

28 yanvar tongida Zaporijjya viloyati harbiy ma’muriyati rahbari Rossiya tomonidan o‘qqa tutish oqibatida Zaporijjyada 12 ta turar joy uyi zarar ko‘rganini ma’lum qildi, zarbalardan biri ko‘p qavatli uy hovlisiga to‘g‘ri kelgan. “Yuzdan ortiq kvartira va yigirmata avtomobilga shikast yetgan”, — deb yozgan Ivan Fedorov Telegram’da. Olti kishi jabrlangan.