Zominda “Suffa” platosida Tracker va Cobalt xandaqqa tushib ketdi

30 yanvar kuni Zomin tumanidagi “Suffa” platosi hududida ikki holat qayd etildi. Tracker va Cobalt rusumli avtotransport vositalari haydovchilari boshqaruvni yo‘qotishi oqibatida yo‘l chetidan chiqib ketib, xandaqqa tushib qolgani haqida Zomin tumani FVBning O‘rmon yong‘inlarini bartaraf etishga ixtisoslashtirilgan yong‘in-qutqaruv otryadiga xabar kelib tushgan.

Xabarga ko‘ra, qutqaruvchilar qisqa fursat ichida voqea joyiga yetib borgan. Tegishli xizmatlar bilan hamkorlikda maxsus texnika va tortish uskunalari yordamida avtomobillar xandaqdan chiqarilib, xavfsiz joyga joylashtirilgan.

Tog‘li hududlarda va muzlamali yo‘llarda harakatlanishda tezlikni me’yorda saqlash, xavfsiz masofani ta’minlash hamda texnik holatni tekshirib chiqish muhim ahamiyatga ega. Ayniqsa, “Suffa” platosi kabi baland va ob-havo sharoiti tez o‘zgaruvchan hududlarda ehtiyotkorlikni oshirish tavsiya etiladi.

Hodisa oqibatida tan jarohati olganlar yo‘q. Voqea yuzasidan tegishli xizmatlar tomonidan o‘rganish ishlari olib borilmoqda.