Tramp Eron AQSh bilan «jiddiy muzokaralar» olib borayotganini aytdi

AQSh prezidenti Donald Tramp 31 yanvar kuni Eron Qo‘shma Shtatlar bilan «qoniqarli» bitim tuzishi kerakligini aytdi – bunday bitimga ko‘ra mamlakatda yadroviy qurol bo‘lmaydi.

«Ular bunga ko‘nadimi-yo‘qmi, bilmayman. Ammo ular biz bilan muzokaralar olib bormoqda. Bu jiddiy muzokaralar», – dedi Tramp jurnalistlarga Air Force One samolyoti bortida Floridaga uchayotganida.

Tramp Eron bilan nima qilmoqchi ekani haqida ochiq gapirmagan. Avvalroq AQSh prezident Vashington Tehron masalasida qanday yo‘l tutish bo‘yicha qarorni muzokaralar natijalariga ko‘ra qabul qilishini aytgandi. «Ko‘ramiz, bundan nimadir chiqarmikin. Aks holda, nima bo‘lishini ham qarab ko‘ramiz… Bizda u yerga yuborilgan juda katta flot bor», – degandi u Fox News muxbiriga.

Tramp AQSh xavfsizlik nuqtayi nazaridan Yaqin Sharqdagi ittifoqchilariga ehtimoliy zarbalar rejalari haqida xabar bermayotganini qo‘shimcha qilgan. «Biz ularga reja haqida ayta olmaymiz. Agar men ularga reja haqida gapirganimda, bu sizga reja haqida aytish bilan deyarli bir xil darajada yomon bo‘lardi – aslida, bu undan ham yomonroq bo‘lishi mumkin edi», – dedi u.

Donald Tramp yanvar oyi boshida Erondagi rejim hukumatga qarshi namoyishlarni shafqatsizlarcha bostirishiga javoban vaziyatga aralashuv bilan tahdid qilgandi. Shu fonda AQSh Eron sohillari yaqiniga «Avraam Linkoln» aviatashuvchisi boshchiligida yirik zarbdor guruhni yubordi.

Shu tufayli AQSh va Eron o‘rtasida to‘g‘ridan to‘g‘ri to‘qnashuv ro‘y berishi borasida xavotir paydo bo‘ldi. Tehron hujum ro‘y bergan taqdirda AQSh va uning ittifoqchilari, jumladan, Isroilning bazalari va kemalariga raketa zarbalari bilan javob qaytarishi haqida ogohlantirgan.

Tramp Eron AQSh bilan urush qilishdan ko‘ra, o‘z yadroviy va raketa dasturlari bo‘yicha kelishuv tuzishni afzal ko‘radi, deb hisoblamoqda.