Tojikiston aholisi uchun Starlink sun’iy yo‘ldosh interneti ishga tushirildi

Tojikiston Markaziy Osiyoda bunday imkoniyatga ega ikkinchi davlat bo‘ldi. Avvalroq, Qozog‘iston aholisi mintaqada birinchi bo‘lib Starlink sun’iy yo‘ldosh internetidan foydalanishni boshlagan edi.

Foto: Starlink

Starlink sun’iy yo‘ldosh interneti endi Tojikiston aholisi uchun ham mavjud. Bu haqda Ilon Maskning SpaceX korporatsiyasiga tegishli kompaniya ijtimoiy tarmoqda e’lon qildi.

«Tojikistonda Starlink yuqori tezlikdagi, past kechikishli internetdan foydalanish imkoniyati paydo bo‘ldi!», deyiladi xabarda.

Standart tarifda Starlink internet narxi oyiga 1100 somoniyni (117,6 dollar) tashkil qiladi. O‘rnatish uskunalari 2700 somoniyga (288,6 dollar) tushadi.

Tojikiston hukumati huzuridagi aloqa xizmati Starlink Tajikistan kompaniyasi bilan litsenziya shartnomasini 2025 yil oktabr oyida imzolagan edi.

Starlink - dunyoning istalgan nuqtasidan yuqori tezlikdagi keng polosali internetga ulanishni ta’minlash uchun mo‘ljallangan global sun’iy yo‘ldosh aloqa tizimi. Tarmoq dunyoning 100 dan ortiq mamlakatlarida, jumladan, Shimoliy va Janubiy Amerika, Yevropaning aksariyat mamlakatlari, Avstraliya, Yangi Zelandiya, Afrikaning bir qismi va Osiyoda faoliyat yuritadi. Markaziy Osiyoda Starlink interneti ishlatilgan birinchi davlat Qozog‘iston bo‘ldi.