Ukraina Rossiyaning «Kapustin Yar» poligoniga zarba yo‘llaganini ma’lum qildi

Ukraina mudofaa kuchlari 2026 yil yanvar oyi davomida Astraxan oblastidagi «Kapustin Yar» poligonidagi angar tipidagi binolar majmuasiga bir qator muvaffaqiyatli zarbalar berdi, deb xabar berdi Ukraina qurolli kuchlari bosh shtabi.

Ukraina harbiylari bayonotiga ko‘ra, ushbu binolar o‘rta masofaga mo‘ljallangan qit’alararo ballistik raketalarni uchirishdan oldingi tayyorgarlik jarayoni uchun ishlatiladi. Angarlar bo‘ylab zarbalar Ukrainada ishlab chiqarilgan «Flamingo» rusumli qanotli raketalar bilan berilgan.

«Mavjud ma’lumotlarga ko‘ra, poligon hududida binolarning bir qismi turli darajada zarar ko‘rgan, angarlardan biri jiddiy shikastlangan, shaxsiy tarkibning bir qismi hududdan evakuatsiya qilingan», – deyiladi Ukraina qurolli kuchlari xabarida.

Rossiya tomoni bu xabar yuzasidan munosabat bildirmagan.

Ukraina qurolli kuchlariga ko‘ra, Rossiyaning «Oreshnik» o‘rta masofali raketa kompleksi «Kapustin Yar» poligonida joylashgan. 2025 yil oktyabrida Ukraina xavfsizlik xizmati Ukraina qurolli kuchlari harbiylari poligondagi «Oreshnik» raketalaridan birini yo‘q qilganini ma’lum qilgandi. 2026 yil 9 yanvarga o‘tar kechasi RF mudofaa vazirligi Lviv oblastiga «Oreshnik» bilan zarba berdi. Ukraina rasmiylariga ko‘ra, raketa aynan «Kapustin Yar» poligonidan uchirilgandi.