O‘monda Amerika-Eron muzokaralari boshlandi

6 fevral tongida O‘mon poytaxti Maskat shahrida AQSh va Eron delegatsiyalari ishtirokidagi muzokaralar boshlandi, deb xabar bermoqda Erondagi Mehr axborot agentligi.

Eron delegatsiyasiga islom respublikasi tashqi ishlar vaziri Abbos Aroqchi rahbarlik qilmoqda. Amerika tomonidan AQSh prezidenti maxsus vakili Stiv Uitkoff, Donald Trampning kuyovi Jared Kushner hamda AQSh qurolli kuchlari markaziy qo‘mondonligi boshlig‘i, admiral Bred Kuper qatnashmoqda.

Muzokaralar mavzusi Eronning yadroviy dasturi va islom respublikasiga nisbatan sanksiyalarni yumshatish masalasi bo‘lishi aytilgan.

Erondagi keng ko‘lamli namoyishlardan keyin AQSh prezidenti Donald Tramp agar mahalliy rasmiylar yadroviy kelishuvdan bosh tortadigan bo‘lsa, Tehron bo‘ylab harbiy zarbalar yo‘llash bilan tahdid qilgandi. Keyinroq u Vashington va Tehron muzokaralar olib borayotgani, Eron masalasi bo‘yicha qanday yo‘l tutishni shu muzokaralardan keyin hal qilishini aytgandi.

AQSh davlat kotibi Marko Rubio Qo‘shma Shtatlar muzokaralarda Eronning raketa va yadro dasturlari, Yaqin Sharqdagi terrorchi guruhlar Tehron tomonidan qo‘llab-quvvatlanishi, shuningdek, Eron rasmiylarining o‘z aholisiga munosabatini muhokama qilmoqchi ekanini aytgandi. Bunga javoban Tehron faqat yadro dasturini muhokama qilishga tayyorligini bildirgandi.

4 fevral kuni Axios nashri manbalarga tayanib, AQSh kun tartibi bo‘yicha kelishmovchiliklar tufayli Eron bilan muzokaralarni bekor qilgani haqida xabar bergandi. Lekin Eron Tashqi ishlar vazirligi bu ma’lumotni tasdiqlamagandi.

O‘mondagi muzokaralar boshlanishidan oldin AQSh hukumati Erondagi o‘z fuqarolarini ushbu mamlakatni zudlik bilan tark etishga chaqirgandi.