Istanbuldagi qotillik ishida yangi holat: yana bir o‘zbekistonlik ayol bedarak yo‘qolgan

Turkiyaning Istanbul shahrida o‘zbekistonlik Sayyora Ergashaliyeva bedarak yo‘qoldi. Bu haqda mazkur mamlakatda faoliyat yurituvchi O‘zbek xotin-qizlari huquqlarini himoya qilish jamiyati xabar berdi.

Jamiyatning Kun.uz'ga ma’lum qilishicha, uning yo‘qolishi avvalroq Istanbulda qotillik qurboni bo‘lgan Durdona Hakimova ishi bilan bog‘liq bo‘lishi mumkin. Boisi Sayyora Ergashaliyeva mazkur qotillikda gumonlanayotganlardan biri bilan birga yashagan.

Ta’kidlanishicha, Ergashaliyevaning yaqinlari O‘zbekistondan Istanbulga kelib uni topishda jamiyatdan amaliy yordam so‘ragan. Tashkilot Istanbuldagi O‘zbekiston Bosh konsulxonasi bilan birga holatni har tomonlama va xolisona o‘rganish, shuningdek, bedarak yo‘qolgan shaxsni topish uchun tegishli choralarni ko‘rgan.

“Advokatlarning professional va shoshilinch sa’y-harakatlari natijasida tergov ishlari jadallashtirilib, ikkinchi jinoyat ehtimoli yuzasidan DNK tahlillari, shuningdek, hodisa joyini batafsil ko‘zdan kechirish kabi muhim tergov harakatlari amalga oshirildi. Jamiyatimiz ushbu ish yuzasidan Turkiya Respublikasi tergov organlari bilan doimiy va yaqin hamkorlikda faoliyat olib bormoqda.

Ergashaliyeva Sayyora Bahromjon qizini aniqlash va topish maqsadida jamiyat tomonidan barcha mavjud imkoniyatlar safarbar etilgan. Shu munosabat bilan Turkiya jamoatchiligi va vakolatli idoralardan hamkorlik va amaliy yordam so‘raladi. Agar mazkur holat yuzasidan biror ma’lumot yoki muhim ma’lumotga ega bo‘lsangiz, jamiyat bilan bog‘lanishingizni so‘raymiz”, – deyiladi xabarda.

Turkiya huquqni muhofaza qiluvchi organlari hozircha holat yuzasidan rasmiy bayonot bergani yo‘q.

Eslatib o‘tamiz, Istanbuldagi chiqindi konteyneridan jasadi topilgan Durdona Hakimova o‘limida gumonlanib ikki nafar o‘zbekistonlik qo‘lga olingan. Bu qotillik Turkiya jamoatchiligida norozilik namoyishlariga sabab bo‘ldi.