Markaziy Osiyo energetika va suv xo‘jaligi vazirlarining uchrashuvi bo‘lib o‘tdi

13 fevral kuni Toshkentda O‘zbekiston, Qirg‘iziston, Qozog‘iston va Tojikiston Respublikalari energetika hamda suv xo‘jaligi vazirlarining navbatdagi ishchi uchrashuvi bo‘lib o‘tdi, deya xabar berdi Energetika vazirligi axborot xizmati.

Uchrashuvda O‘zbekiston energetika vaziri J.Mirzamahmudov, suv xo‘jaligi vaziri Sh.Hamrayev, Qirg‘iziston energetika vaziri T.Ibrayev, Qozog‘iston energetika vaziri Y.Akkenjyenov hamda Tojikiston Respublikasi Energetika va suv resurslari vaziri D.Juma ishtirok etgan. Shuningdek, tadbirda mazkur mamlakatlar energetika kompaniyalari rahbarlari va mas’ul mutaxassislari ham qatnashgan.

Muzokaralar chog‘ida so‘nggi yillarda do‘st va qardosh davlatlar prezidentlari tashabbusi bilan yo‘lga qo‘yilgan ko‘p tomonlama hamkorlik barcha yo‘nalishlarda, xususan, yoqilg‘i-energetika sohasida ham izchil va samarali rivojlanib borayotgani alohida ta’kidlandi.

Uchrashuv davomida joriy kuz-qish mavsumini betalafot o‘tkazish, vegetatsiya davrida suv-energetika tizimlarining barqaror va uzluksiz ishlashini ta’minlash, shuningdek, o‘zaro hamkorlikni yanada chuqurlashtirish masalalari muhokama qilindi. Tomonlar tarmoqlar ish rejimlari bo‘yicha grafiklarni kelishib oldi.