FT: Rubio Myunxen konferensiyasidagi nutqida Rossiya va Ukrainani bir marta ham tilga olmadi

Germaniyalik diplomatning fikricha, AQSh davlat kotibining nutqi yevropaliklarni qiziqtirgan mavzulardan ko‘ra ko‘proq Amerikaning ichki masalalariga bag‘ishlangan.

Foto: AP

AQSh davlat kotibi Marko Rubioning xavfsizlik bo‘yicha Myunxen konferensiyasidagi chiqishi ayrimlar tomonidan sovuq kutib olindi, deb yozadi Financial Times (FT) gazetasi.

"Bu biz kutgan javob emas", - degan nashrga nemis diplomatlaridan biri.

Uning so‘zlariga ko‘ra, nutq yevropaliklarni qiziqtirgan mavzulardan ko‘ra ko‘proq Amerikaning ichki masalalariga bag‘ishlangan. Yana bir yevropalik mansabdorning qayd etishicha, nutq Make America Great Again (MAGA, "Amerikani yana buyuk qilamiz") harakati ruhida bo‘lgan.

"Rossiya biror marta tilga olinmadi, Ukraina biror marta tilga olinmadi", - degan u.

Financial Times shuningdek, Berlindagi Fan va siyosat fondi siyosatshunosi Piya Furxopning fikrlarini keltirgan.

"Bu zaharlangan sovg‘a", - degan u AQSh davlat kotibining hamkorlikda ishlash to‘g‘risidagi chaqirig‘i haqida fikr bildirarkan.

Rubio Myunxen konferensiyasidagi chiqishida AQSh o‘zini himoya qila olmaydigan zaif ittifoqchilarni xohlamasligini va Vashingtondagilar kuchli Yevropani ko‘rishni istashini ta’kidlagan.