Toshkent viloyati bog‘chalaridagi ommaviy zaharlanish bilan bog‘liq ishda 11 kishi sudlanmoqda

2025 yil sentabr oyida Toshkent viloyatidagi bog‘chalarda bolalarning ommaviy zaharlanishi holati bo‘yicha qo‘zg‘atilgan ish jinoyat ishlari bo‘yicha Bo‘ka tuman sudi ish yurituviga kelib tushdi. Bu haqda Oliy sud matbuot kotibi Aziz Obidov xabar qildi.

Sud ishiga 11 kishi jalb qilingan. Ular bolalar bog‘chalari uchun mahsulot ishlab chiqarish va yetkazib berish hamda xizmat ko‘rsatish bilan bog‘liq kompaniyalarda rahbarlik va texnik lavozimlarda ishlagan shaxslardir:

• R. O. (erkak, 1985 yilda Toshkent viloyatida tug‘ilgan, Shark Milk Product MChJ direktori);
• S. S. (erkak, 1985 yilda Toshkent viloyatida tug‘ilgan, Shark Milk Product MChJ ta’sischisi va sotuv bo‘limi menejeri);
• F. O. (erkak, 1990 yilda Toshkent viloyatida tug‘ilgan, Shark Milk Product MChJ ta’sischisi va direktori o‘rinbosari);
• A. S. (erkak, 1987 yilda Qashqadaryo viloyatida tug‘ilgan, Shark Milk Product MChJ bosh texnologi);
• R. X. (erkak, 1982 yilda Toshkent viloyatida tug‘ilgan, Shark Milk Product MChJ texnologi);
• M. N. (erkak, 1991 yilda Toshkent viloyatida tug‘ilgan, Shark Milk Product MChJ texnologi yordamchisi);
• J. X. (erkak, 1993 yilda Buxoro viloyatida tug‘ilgan, Governess Business MChJ direktori);
• F. D. (erkak, 1993 yilda Toshkent viloyatida tug‘ilgan, Kinder Garden Group MChJ direktori);
• I. S. (erkak, 2000 yilda Sirdaryo viloyatida tug‘ilgan, Innavation Outsourcing Servise MChJ direktori);
• B. R. (erkak, 1992 yilda Sirdaryo viloyatida tug‘ilgan, Nishon invest MChJ direktori);
• D. Q. (ayol, 1997 yilda Toshkent viloyatida tug‘ilgan, Shark Milk Product MChJ laboranti).

Ayni paytda jinoyat ishini ko‘rishni tayinlash masalasi o‘rganilmoqda.

Ular Jinoyat kodeksining 186-moddasi (Xavfsizlik talablariga javob bermaydigan tovarlarni o‘tkazish maqsadini ko‘zlab ishlab chiqarish, saqlash, tashish yoxud o‘tkazish, ishlar bajarish yoki xizmatlar ko‘rsatish) 4-qismi «b» bandi va 257−1-moddasi (Sanitariyaga oid qonunchilikni yoki epidemiyaga qarshi kurash qoidalarini buzish) 1-qismida nazarda tutilgan jinoyatlarni sodir etganlikda ayblanmoqda.

Ayblanuvchilarning 10 nafariga qamoqqa olish va 1 nafariga uy qamog‘i tarzidagi ehtiyot choralari qo‘llangan.

Bog‘chalardagi ommaviy zaharlanish

2025 yil 26 sentabr kuni Bo‘ka, Piskent, Oqqo‘rg‘on, Quyi Chirchiq, Bekobod tumanlari, Nurafshon va Olmaliq shahridagi bir qator maktabgacha ta’lim muassasalarida tarbiyalanuvchilarning ommaviy zaharlanishi ro‘y bergandi. Dastlabki xabarlarda 100 dan ortiq bola shifoxonalarga yotqizilgani aytilgandi. Keyinchalik viloyat tibbiyot muassasalariga zaharlanish shikoyati bilan murojaat qilgan bolalar soni 2 mingga yaqin ekani ma’lum bo‘ldi.

Bir necha kun o‘tib bolalarning barchasi sog‘ayib, uylariga javob berilgandi.

Ushbu voqeadan keyin sut mahsulotlari ishlab chiqaruvchi korxonalar hamda autsorsing kompaniyalari mansabdor shaxslari bo‘lgan jami 7 kishi qo‘lga olingan, ularga nisbatan jinoiy ish ochilib, tergov harakatlari boshlangandi.

Tergov ishi sinchkovlik bilan, to‘la va sifatli o‘tkazilishini ta’minlash maqsadida jinoyat ishi Bosh prokuratura tomonidan nazoratga olingan hamda bosh prokurorning birinchi o‘rinbosari rahbarligida maxsus ishchi guruh tuzilgandi.