Iordaniya va Bahraynda bo‘lgan fuqarolarga xavfsizlik bo‘yicha tavsiyalar berildi

Mintaqadagi vaziyatning keskinlashuvi munosabati bilan O‘zbekistonning Ar-Riyoddagi elchixonasi Iordaniya va Bahrayn hududida bo‘lib turgan fuqarolarga shaxsiy xavfsizlik choralarini kuchaytirish bo‘yicha rasmiy tavsiyalar bilan chiqdi.

Foto: Hufton / Crow

“Dunyo” AA xabar berishicha, elchixona murojaatida vatandoshlardan aholi gavjum joylar va ommaviy tadbirlardan uzoqroq yurish, harbiy obektlar joylashgan hududlarga yaqinlashmaslik hamda mahalliy hokimiyat organlarining xavfsizlik bo‘yicha ko‘rsatmalariga qat’iy rioya qilish so‘ralgan.

Shuningdek, fuqarolarga shaxsni tasdiqlovchi hujjatlarni doimo yonida olib yurish tavsiya etildi.

Zarur hollarda O‘zbekistonning Ar-Riyod shahridagi diplomatik vakolatxonasiga murojaat qilish mumkin: telefon: +966 11 263 52 23, favqulodda holatlar uchun: +966 56 721 77 31 (Telegram, WhatsApp).

Elchixona barchani ehtiyotkorlikka, tinchlik va xavfsizlik qoidalariga qat’iy rioya qilishga chaqirdi.