Zelenskiy: “Drujba”ni ta’mirlash bir yarim oygacha davom etishi mumkin

Ukraina prezidenti Volodimir Zelenskiy bahslarga sabab bo‘layotgan “Drujba” neft quvuri ishi qayta tiklanishigacha yana bir necha hafta vaqt o‘tishi mumkinligini bildirdi. «Mavjud ma’lumotlarga ko‘ra, bu quvurni yana bir — bir yarim oy ichida ishga tushirish mumkin», — dedi u 5 mart, payshanba kuni. Shu bilan birga, Zelenskiy shaxsan o‘zi bu quvurni tiklamaslikni afzal ko‘rishini tushuntirdi.

Bu neft quvuri Rossiya neftini Vengriya va Slovakiyaga yetkazib beradi. Ukraina tomoni ma’lumotlariga ko‘ra, u yanvar oyida Rossiya zarbasi natijasida shikastlangan va vaqtincha ishdan chiqqan. Vengriya va Slovakiya Zelenskiyni ta’mirlashni ataylab cho‘zayotganlikda ayblamoqda. Bu bahs ikki mamlakatning Kiyev bilan munosabatlarida jiddiy taranglikka olib keldi.

Zelenskiy quvur ishini qayta tiklash, ehtimol, Kiyev uchun ajratilishi kerak bo‘lgan 90 milliard yevro miqdoridagi Yevropa Ittifoqi kreditini blokdan chiqarish uchun zarurligini tan oldi. Bu kreditga Vengriya veto qo‘ygan. Vengriya bosh vaziri Viktor Orban “Drujba” orqali neft yetkazib berish to‘xtaganini vaj qilib, ham ushbu kreditni, ham Rossiyaga qarshi yangi sanksiyalar paketini to‘sib turibdi. Har ikki qarorni ham Rossiyaning Ukrainaga hujumi to‘rt yilligi arafasida — fevral oyi oxirigacha qabul qilish rejalashtirilgan edi.

Shikastlangan neft quvuri atrofidagi bahsda Orban Ukrainaga o‘z inspeksion missiyasini yuborish niyatida. O‘ng populist bosh vazirning tegishli qarori 5 martga o‘tar kechasi Vengriya rasmiy axborotnomasida e’lon qilindi. Missiyaga energetika vaziri o‘rinbosari rahbarlik qilishi kerak, uning tarkibiga Vengriyaning MOL neft konserni vakili ham kiradi.

Quvur shikastlanganiga qaramay, hozircha Vengriya va Slovakiyaning neft ta’minoti xavf ostida emas. Yevropa komissiyasi ma’lumotlariga ko‘ra, har ikki mamlakat taxminan uch oylik neft zaxirasiga ega. Bundan tashqari, Xorvatiya boshqarayotgan Adriatika neft quvuri orqali muqobil yetkazib berish ham mumkin, ammo bu Rossiya neftiga nisbatan qimmatroqqa tushadi. Eron bilan urush esa neft narxlarining yanada oshishiga qo‘shimcha turtki bermoqda.