Ukraina Bryanskdagi zavodga zarba berdi

Ukraina qurolli kuchlarining Bryansk bo‘ylab raketa zarbasi oqibatida olti kishi halok bo‘ldi va 37 kishi yaralandi. Bryansk oblasti gubernatori Aleksandr Bogomaz yaradorlarning barchasi shifoxonaga yotqizilganini ma’lum qilgan.

Region rahbari hodisani «terrorchilik hujumi» deb atagan, lekin bu hujum oqibatlariga oydinlik kiritmagan. «Ushbu g‘ayriinsoniy terrorchilik akti oqibatlarini bartaraf etish bo‘yicha birinchi navbatdagi choralar ko‘rilmoqda», – deya qo‘shimcha qilgan Bogomaz.

Gubernator Bryanskning Sovetskiy rayonida yong‘indan keyin tutun ko‘tarilgani haqida xabar bergan, shu bilan birga, yong‘inni ukrainlar hujumi bilan bevosita bog‘lamagan. U Bryanskda yashovchilarga zaruratsiz ko‘chaga chiqmaslik va derazalarni ichkaridan yopib o‘tirishni tavsiya qilgan, shuningdek, tafsilotlarni keltirmasdan «fuqarolar evakuatsiyasi»ni tilga olgan.

Ukraina prezidenti Volodimir Zelenskiy jurnalistlar bilan muloqotda Bryanskka hujumni Kiyev uyushtirganini tasdiqlagan. «Bosh qo‘mondon Sirskiy menga qo‘ng‘iroq qildi va hozirgina amalga oshirilgan muvaffaqiyatli amaliyot haqida so‘zlab berdi. Bryanskdagi zavodga aniq zarba berilgan», – degan u.

Zelenskiyning izohlashicha, gap Rossiya raketalari uchun elektronika va butlovchi qismlar ishlab chiqaradigan zavod haqida ketmoqda. «Aynan shaharlarimizga, qishloqlarimizga, fuqarolarga hujum qilayotganlarga [zarba berildi]. Biz himoyalanyapmiz», – deya qo‘shimcha qilgan Ukraina prezident.

Ukraina qurolli kuchlari bosh shtabi zarba aks etgan videoni e’lon qilgan. Ukrain harbiylari aniqlik kiritishicha, Storm Shadow raketalari bilan yo‘llangan bu zarbalar «Kremniy El» mikroelektronika zavodi bo‘ylab berilgan. Ukraina qurolli kuchlari izohiga ko‘ra, zavodga Rossiyaning «harbiy-iqtisodiy salohiyati»ni pasaytirish maqsadida hujum qilingan.

Xabarda «nishonga aniq zarba berilgani va ishlab chiqarish quvvatlariga jiddiy zarar yetkazilgani» qo‘shimcha qilingan. Zarar ko‘lami aniqlashtirilmoqda.

Ukraina qurolli kuchlari bu hujumda qancha raketadan foydalangani ma’lum qilinmagan. Videoda zavod hududida besh marta portlash bo‘lganini ko‘rish mumkin.

Rossiya va Ukrainadagi harbiy mavzuga ixtisoslashgan telegram-kanallar ukrain harbiylarining hujumi vaqtida va zarbalardan keyin Bryanskda yashovchilar tomonidan olingan bir necha videolarni tarqatgan. Ulardan ayrimlarida uylar shikastlangani va mashinalar yonib ketganini ham ko‘rish mumkin. Xabarlarda aytilishicha, raketalardan biri turar joy binosiga urilgan. Videolardan birining muallifi zarbadan keyin mahalliy aholi vakillaridan birining «qo‘li uzilib ketgani»ni aytgan. «Meduza» tahliliga ko‘ra, bu video zavoddan taxminan 150 metr masofada olingan.

Astra nashriga ko‘ra, raketalardan biri zavodning yig‘ish sexiga tushgan. Shuningdek, korxona bilan yonma-yon joylashgan Bryansk biznes va boshqaruv texnikumi binosi ham zarba ostida qolgan.

Zarba payti Bryanskda yashovchilardan birining avtomobili videoregistratori kamerasiga muhrlangan. Kadrlarda raketalardan biri zavoddan bir necha yuz metr uzoqlikdagi yo‘lga tushganini ko‘rish mumkin. Shundan keyin mashina bu yerdan shoshilinch tarzda keta boshlaydi, kamera esa yana bir raketa zarbasini tasvirga oladi – u ham korxonadan bir necha yuz metr masofada, yo‘ldan yanada uzoqroqda portlagan.

Nashrning e’tibor qaratishicha, mahalliy aholi vakillari chatlarda sexda jiddiy vayronagarchiliklar yuzaga kelgani, vayronalar ostida odamlar ko‘pligini yozmoqda. Ma’lum qilinishicha, korxonaning ma’muriy binosiga ham zarba berilgan. Vayronalar ostida odamlar qolayotgani haqidagi ma’lumotlar rasman tasdiqlanmagan.

«Kremniy El» – Rossiyadagi eng yirik mikroelektronika korxonalaridan biri hisoblanadi. Uning mahsulotlaridan harbiy sanoatda ham foydalaniladi: zavodda ishlab chiqarilgan chiplar raketa komplekslari va dronlar uchun qo‘llanadi. Zavodga oldin ham bir necha bor ukrain dronlari tomonidan hujum uyushtirilgandi: 2023 yil avgust va sentabr oylarida, shuningdek, 2024 yil oktyabrida. 2025 yil yanvarida esa navbatdagi hujumdan keyin zavod faoliyati to‘xtatilgandi.