Jizzaxda kuchli yomg‘irdan keyin sel kuzatildi

Jizzax viloyatining G‘allaorol tumanida kuchli yomg‘ir yog‘ishi natijasida sel suvlari kuzatildi. Favqulodda vaziyatlar xizmati ma’lumotiga ko‘ra, hodisa oqibatida talafotlar qayd etilmagan.

Foto: Videodan kadr

Ma’lum qilinishicha, joriy yilning 5 aprel kuni soat 21:15 atrofida G‘allaorol tumani “Quytosh” ShFY hududida joylashgan tog‘ va adirliklarda kuchli yomg‘ir yog‘gan. Shuning oqibatida sel suvlari yuzaga kelib, tabiiy yo‘nalish bo‘ylab xavfsiz oqib o‘tgan.

Mutasaddilarga ko‘ra, sel suvlari aholi yashash hududlariga zarar yetkazmagan. Hozirda vaziyat to‘liq nazoratga olingan.

Mutaxassislar bahor oylarida, ayniqsa tog‘li va adirlik hududlarda kuchli yomg‘irlar natijasida sel hodisalari tez-tez kuzatilishini ta’kidlaydi. Shu bois aholiga ehtiyotkor bo‘lish, ob-havo ogohlantirishlariga amal qilish tavsiya etiladi.