Tramp ikki haftalik sulh e’lon qildi

AQSh prezidenti Donald Tramp Qo‘shma Shtatlar Ho‘rmuz bo‘g‘ozi zudlik bilan ochilishi sharti bilan Eronni bombardimon qilishni ikki haftaga to‘xtatishini ma’lum qildi.

Tramp Truth ijtimoiy tarmog‘ida sulh ikki tomonlama bo‘lishini qayd etgan.

«Men Eronga hujum qilishni ikki hafta muddatga to‘xtatib turishga roziman.

Bu ikki tomonlama sulh bo‘ladi!

Buning sababi shundaki, biz barcha harbiy maqsadlarga allaqachon erishdik va ularni ortig‘i bilan bajardik. Eron bilan uzoq muddatli tinchlik kelishuviga juda yaqinmiz.

Biz Erondan o‘n banddan iborat taklif oldik va uni muzokaralar uchun amaliy asos deb hisoblaymiz», – deya yozgan Tramp.

Eron hukumati sulhga roziligini tasdiqlagan. Tehronning rasmiy bayonotida mamlakat «ulkan g‘alabaga erishgani va jinoyatchi Amerikani o‘zining o‘nta banddan iborat rejasini qabul qilishga majbur qilgani» aytilgan.

Eron tashqi ishlar vaziri Abbos Aroqchi alohida xabarida ikki hafta mobaynida savdo kemalari o‘z harakatlarini eronlik harbiylar bilan muvofiqlashtirgan holda Ho‘rmuz bo‘g‘ozidan o‘tishi mumkinligini tasdiqlagan. Keyinroq Tramp Truth ijtimoiy tarmog‘ida ushbu xabardan skrinshotni e’lon qilgan.

Eron davlat nashrlari yozishicha, AQSh bilan to‘g‘ridan to‘g‘ri muzokaralar 10 aprel kuni Pokistonda boshlanadi. Oq uy matbuot kotibi Kerolayn Livitt AQSh bunday imkoniyatni muhokama qilayotganini tasdiqlagan, ammo bu borada Trampning rasmiy bayonotini kutish kerakligini qayd etgan.

The New York Times eronlik rasmiylar orasidagi manbalariga tayanib, Tehron «Pokistonning jon holatdagi diplomatik urinishlari» va so‘nggi daqiqada Eronni «moslashuvchanlik ko‘rsatishga» chaqirgan Xitoyning aralashuvi bilan o‘t ochishni to‘xtatish bo‘yicha taklifni qabul qilgani haqida yozgan.

CNN nashri Isroil ham ikki haftalik sulhga qo‘shilishini ma’lum qilgan.

Sulh aynan qachon kuchga kirishi hozircha aniq emas. Donald Trampning bayonotidan keyin Isroil va Birlashgan Arab Amirliklari Erondan navbatdagi raketa va dronlar uchib kelgani haqida xabar bergan.

Trampning xabari o‘zi tomonidan Eronga Ho‘rmuz bo‘g‘ozini ochish uchun bergan dedlaynga ikki soatcha vaqt qolganida e’lon qilindi. Bundan oldinroq u agar muhlat yakuniga qadar bo‘g‘oz ochilmaydigan bo‘lsa «bugun tunda butun tamaddun halok bo‘lishi» haqida yozgandi.

Trampning oxirgi bayonotidan bir necha soat oldin muzokaralardagi asosiy vositachi bo‘lib turgan Pokiston bosh vaziri Shahboz Sharif AQSh prezidentidan tinchlik kelishuviga erishish uchun dedlaynni ikki haftaga surishga chaqirgandi. Sharif o‘z bayonotida Eronga ham murojaat qilib, «xayrixohlik belgisi» sifatida Ho‘rmuz bo‘g‘ozini ochishni so‘ragandi.