Fuqarolardan varrak uchirishda cheklovlarga rioya qilish so‘raldi

Iliq ob-havo sharoitida varrak uchirish bilan bog‘liq holatlar ko‘paymoqda. Mas’ul idoralar fuqarolarni aeroportlar yaqinida bunday mashg‘ulotlardan tiyilishga chaqirib, bu parvozlar xavfsizligiga jiddiy tahdid solishini ta’kidlamoqda.

Foto: Uzbekistan Airports

Qayd etilishicha, varraklar balandga ko‘tarilib, samolyotlarning uchish va qo‘nish yo‘llariga tushib qolishi mumkin. Bu esa havo kemalari bilan to‘qnashish, texnik nosozliklar va favqulodda holatlar yuzaga kelish xavfini oshiradi.

Ayniqsa, mustahkam yoki kuchaytirilgan iplar samolyot uskunalariga zarar yetkazishi yoki dvigatellarga tushib qolishi ehtimoli mavjud.

O‘zbekiston Havo kodeksining 17-moddasiga muvofiq, parvozlar xavfsizligiga tahdid soladigan faoliyat turlari qatoriga aeroport va uning atrofida varrak uchirish ham kiradi.

Shuningdek, Ma’muriy javobgarlik to‘g‘risidagi kodeksning 116²-moddasiga ko‘ra, havo hududidan ruxsatsiz foydalanish uchun BHMning 20 baravaridan 100 baravarigacha jarima yoki 15 sutkagacha qamoq jazosi belgilangan. Agar bu kabi harakatlar aviatsiya hodisasiga sabab bo‘lsa, jinoiy javobgarlik ham kelib chiqishi mumkin.

Mas’ullar poytaxt aholisi va mehmonlaridan varrak uchirish uchun aeroportlardan uzoq, xavfsiz hududlarni tanlashni hamda belgilangan qoidalarga qat’iy rioya qilishni so‘ramoqda.