Markaziy bank boshqaruvining qarori bilan ayrim idoraviy normativ-huquqiy hujjatlarga o‘zgartishlar kiritildi. Unga muvofiq, mijozlarni identifikatsiya va autentifikatsiya qilish jarayonida foydalaniladigan jismoniy shaxslarning biometrik ma’lumotlari O‘zbekiston hududida saqlanishi majburiy etib belgilandi.
Yangi talab to‘lov tizimlari operatorlari, to‘lov xizmatlarini yetkazib beruvchilar, faktoring elektron platformalari hamda kredit byurolari faoliyatiga tatbiq etiladi.
Shu bilan birga, hujjatda mijozlarga tegishli biometrik bo‘lmagan boshqa turdagi shaxsga doir ma’lumotlar «Shaxsga doir ma’lumotlar to‘g‘risida»gi qonun talablariga muvofiq O‘zbekiston hududidan tashqarida ham saqlanishi va ularga ishlov berilishi mumkinligi qayd etilgan.
Markaziy bank qarori Adliya vazirligida 2026-yil 1-avgust kuni davlat ro‘yxatidan o‘tkazilgan bo‘lib, rasmiy e’lon qilingan kundan e’tiboran kuchga kirgan.
